ب م ت نین تهلوکه سیزلیک شوراسی ایرانا قارشی 3-جو قطعنامه یه سس و

ب م ت نین تهلوکه سیزلیک شوراسی ایرانا قارشی 3-جو قطعنامه یه سس وئردی

آذربایجان اویرنجی حرکاتی : ب م ت – بیرلشمیش ملت لر تشکیلاتی نین امنیت شوراسینین عضولری اورانیوم زنگین لشدیریلمه سی چالیشمالارینی دایاندیرماقدان بویون قاچیردیغینا گوره ایرانا قارشی یئنی تحریم لرین تطبیق ائدیلمه سینه قرار وئریب. تهلوکه سیزلیک شوراسینین 15 عضووندن 14-و یئنی تحریم لردن عبارت قطعنامه یه مثبت سس وئریب. اندونزی ایسه طرف سیز رای له چیخیش ائدیب. قطعنامه ده اورانیوم زنگین لشدیریلمه سی ایشینده فعال اولان شخص لر و شرکت لره قارشی تجارت،سفر و مالی محدودیت لر نظرده توتولور. بوندان باشقا ایرانین بانک فعالیت لرینین اوزه رینده داها جدی نظارتین حیاتا کئچیریلمه سی نظرده توتولور.

 امنیت شوراسینین موقتی عضولریندن بیر نئچه سی او جمله دن ویتنام، لیبی و جنوبی آفریقا ایرانا قارشی تحریم لرین بو ئولکه نین داها دا تجرید اولونماسی و مناسبت لرین داها دا گرگین لشمه سینه سبب اولا بیله جه یی باره ده خبردارلیق ائتمیشدیلر. بو گون آتم انرژیسی اوزره بین الخالق آژانس  یایدیغی آچیقلامادا ایسه بیلدیریر کی، ایرانین قانونسوز آتم ماده لریندن استفاده ائتمه سی ایله باغلی الده هر-هانسی ثبوت اولماسا دا بو ئولکه نین آتم چالیشمالاری اولدوقجا نگران ائدیجی دیر.(voa)