پرزیدنت بوش افغانستانا داها چوخ قوه گونده ریلمه سی و ناتونون گئن

پرزیدنت بوش افغانستانا داها چوخ قوه گونده ریلمه سی و ناتونون گئنیش لنمه سینه چاغیریر

آذربایجان اویرنجی حرکاتی: رومانی پایتختی بوخارستده سفرده اولان پرزیدنت بوش رومانی خالقینی تقدیر ائده رک بیلدیریب کی، رومانی ملتی "شرین گوزونون ایچینه دیک باخاراق" ئولکه نی کمونیست دیکتاتورادان آزاد بیر ملته و ناتو عضوونه چئویره بیلیب. او اوکراین و گورجوستانداکی گنج دموکراسی لرین ده عینی شانسا لاییق اولدوقلارینی بیلدیریب. او آمریکانین موقعی نین آیچیق و محکم اولدوغونو بیلدیریب. پرزیدنت بوشون دئدیینه گوره ناتو گورجوستان و اوکراینایا ناتویا عضولوک اوزره فعالیت پلانی تقدیم ائتمه لی دیر. ناتونون قاپیسی ایسه اروپا دموکراسی لرینین اوزونه دائیم آچیق اولمالی دیر. خالق قارشیسینداکی چیخیشیندا جناب بوش بیلدیریب کی، اوکراینا و گورجوستانین ناتویا عضولویه قبول ائدیلمه سی بو ئولکه لرین مستقل و بوتوو اولدوغونو و اولاجاغی باره ده آچیق پیام گوندرمیش اولاجاق. آلمان و فرانسه اروپانین تهلوکه سیزلیینی اساس گتیره رک بو ئولکه لرین ناتویا عضولویو باره ده چکیندیکلرینی بیلدیریبلر. روسیه ایسه بونا قطعی اولاراق قارشی چیخیر و اروپانی هده له ییر.

 پرزیدنت بوش همده راکت لردن مدافعه سیستمی نین قوراشدیریلماسی مسئله سینه توخوناراق دئییب کی، بو سیستمین قوراشدیریلماسی اروپایا قارشی تهراندان گلن تهلوکه لرین قارشیسینی آلماق اوچون واجب دیر. او ناتونون گئنیش لندیریلمه سینین روسیه یه قارشی اولمادیغی کیمی بو سیستمین قورولماسی نین دا روسیه یه قارشی یونلمه دیینی سویله ییب. قید ائدک کی، پرزیدنت بوش ئوز چیخیشیندا افغانستان مسئله سینه ده یئر وئریب. اونون بیلدیردیینه گوره اگر 40 میندن آرتیق ناتو قوه سی افغانستانداکی تروریست لری مغلوب ائده بیلمزسه غرب ئولکه لری اونلارلا ئوز ئولکه لرینین ایچینده اوز- اوزه دورمالی اولاجاق دیر.بو آرادا، بوخارستده افغان پرزیدنتی حمید کارزای ایله ناتو رهبرلرینین گوروشو گوزله نیلیر. )آمئریکانین سسی(