عراق باش وزیری قونشو ئولکه‌لردن انتقاد ائتدی

عراق باش وزیری قونشو ئولکه‌لردن انتقاد ائتدی

آذربایجان اویرنجی حرکاتی : عراق باش وزیری نوری المالکی قونشو ئولکه‌لردن عراقلا امکداشلیق و بو ئولکه‌یه یاردیم ائتمه‌مه‌لری حاقدا انتقاد ائدیب.عراقین قونشو ئولکه‌لر کنفرانسی بوگون آوریل آیی‌نین 22-سینده کویت‌ده ایشینه باشلادی. نوری مالکی ئوز دانیشیقلاریندا دئدی کی، منطقه‌ده‌کی بیر چوخ ئولکه‌ عراقلا سیاسی رابطه‌لری گنیش‌لتمک، بو ئولکه‌نین بورجلارینی باغیشلاماق و یاراقلی گروهلارلا قارشی دورماق حاقدا گؤزه گلن یاردیمی ائتمه‌ییب‌لر .ایکی گونلوک کویت کنفرانسی منطقه‌ده کی ئولکه‌لرین و عراق قونشولاری‌نین نماینده‌لری‌نین قاتیلماسی ایله کئچیریلیر. کنفرانسدا ایران، تورکیه، عربستان، بحرین و مصرین خارجی ایشلر وزیرلری و ائله‌جه‌ده آمریکا و فرانسه خارجی ایشلر وزیرلری، اروپا بیرلییی‌نین خارجی سیاست مسئولو و امنیت شوراسی‌نین دائمی عضوو اولان ئولکه‌لرین نماینده‌لری واردیرلار.نوری مالکی انتقادیندا بللی بیر ئولکه‌دن آد آپارماییب، اما بؤیوک بیر احتماللا عرب ئولکه‌لرین قصد ائدیرمیش. او دئییب کی، عراقدا خاص بیر شرایط حاکیم‌دیر و بیز باشا دوشه بیلمیریک کی، دونیا ئولکه‌لری‌نین بیر چوخو بیزه یاردیمجی اولدوغو حالدا ندن قونشو ئولکه‌لر عینی ایشی گؤرمه‌ییبلر.2005-اینجی ایلده مصر سفیری‌نین قتلیندن سونرا عرب ئولکه‌لری عراقا سفیر گؤندرمکدن چکینیب‌لر. آنجاق عراقلا بعضی عرب ئولکه‌لری و ایران آراسیندا سفیر ده‌ییشیمی اولوب. عرب رسمیلر ده عراقی چوخ  آز زیارت ائدیبلر اما غرب ئولکه‌لری‌ رسمی‌لری‌ و ائله‌جه‌ده ایران رئیس‌ جمهورو عراقا قوناق اولوبلار.نوری مالکی ائله‌جه‌ده بو ئولکه‌نین طلبکارلاری‌نین اونلارین بورجلارینی باغیشلاماماسیندان دا انتقاد ائدیب.(آمریکا سسی) 22/04/2008