مهندس غلامرضا امانی-نین اویرنجی گونو ایله ایلگیلی آذوح-لا موصاحی

مهندس غلامرضا امانی-نین اویرنجی گونو ایله ایلگیلی آذوح-لا موصاحیبه سی حاقدا

علی اهرلی

آذربایجان اویرنجی حرکاتی : اون سوز یئرینه: اویرنجی گونو ایله ایلگیلی جناب مهندس غلامرضا امانی نین آذوح وئبلاگی ایله موصاحیبه سی نی اوخودوم (http://www.azoh.blogsky.com/?PostID=1622) . موصاحیبه نین اون سوزو، اورادا بعضی تاریخی بحث لر و ان سونوندا گوناز تی وی ایله ایلگیلی توتولان موقع منی دوشوندورمه یه باشلادی. بو حاقدا آرتیق آراشدیرماق فیکیرینه دوشدوم. بیر چوخ قدیمی اویرنجی فعالی ایله ارتباطا کئچدیم و اونلارلا غیر مستقیم بو موضوع حاقدا دانیشدیم. بوردا یازدیقلاریم او دانیشیقلارین سونوجودور. هر کسین اعتراضی اولسا اوزو شخصا بو مسئله حاقدا تحقیق ائده بیله ر. اونلارین بو موصاحیبه ده ن هئچ خبرلری یوخدور. امنیتی نده نلرله دانیشدیغیم انسانلارین آدینی بوردا آچیخلامایاجاغام اما زمانی گلنده بو آداملار اوزلری بو مسئله حاقدا ایضاحات وئره بیله رلر. بو یازی اوچ بولومده اولاجاق. بیرینجی مهندس امانی حاقدا، ایکینجی سی اویرنجی گونو و اوچونجو سو ایسه گوناز تی وی حاقدا...

بیر- غلامرضا امانی 35 یاشلی بیر گنج میللی فعال اولاراق آذربایجان یولوندا بویوک هزینه وئریب. حیاتینین ان گنج قسمتی نین بئش ایلین زندان دا کئچیریب. بو آچیدان باخارساق بوتون آذربایجان میلتی بو آدامین حورمتین یئرینه گتیرمه لی دیر. من ده ائله اونا گوره اونا چکدیگی زحمت لرده ن دولایی اوز تشکورومو بیلدیریره م. ان شالله مهندس غلامرضا امانی ایللر بویو یاشار و میلتیمیزین موباریزه سی یولوندا باشاریلی آدیملار آتار.

مهندس امانی 1371 ینجی ایلده اردبیل شهرینین محقق اردبیلی آدلی بیلیم یوردوندان زراعت رشته سینده قبول اولوب. بیر ایل اوخودوقدان سونرا تبریز بیلیم یوردونا انتقال آلیب. 1375 ینجی ایل ده ایسه تبریز بیلیم یوردوندا لیسانس آلیب. یوکسک لیسانس امتحانی نی ایکی یئرده وئریب. بیرینجی دفعه سراسری دانشگاهدا " مکانیزاسیون و بیابان زدائی" و ایکینجی دفعه اردبیل ین آزاد دانشگاهیندا "اصلاح نباتات" رشته سینده یوکسک لیسانس گیریش امتحانی نی وئریب. آما تاسف له قبول اولا بیلمه ییب. بللی اولورکی مهندس غلامرضا بی امانی ساده جه تبریز دانشگاهینین کشاورزی فاکولته سینده ن زراعت اوزه ره لیسانس آلیب و بو موصاحیبه ده اونون کارشناس ارشد اولدوغو عبارتی دوغرو اولابیلمز.

ایکی- اویرنجی گونونه عایید اولان اعتراضلار سه شنبه 19 اردیبهشت 1374 ده تبریز بیلیم یوردونون اونونده کئچیریلیب. بیلیم یوردو حراستی متینگین قاباغین آلابیلمه سین دئیه بو متینگ دانشگاهین آنا قاپی سیندا ناهار ساعت 12:30 دا حیاتا کئچیریلیب. کشاورزی فاکولته سی اونونده هئچ بیر متینگ اولماییب و جناب امانی دانشگاهین اونونده اولان بو متینگ ده دانیشماییب و توتولماییب. بئله لیکه اونون دانیشگاهین اونونده دانیشماسی و توتولماسی دوغرو اولابیلمز. تبریز دانشگاهی اونونده ساده جه بیر بیانیه اوخونوب و اوخونانین آدی بللی دیر. زامانی گلنده او بیانیه نی اوخویان آدامین سویله نه بیله ر. دانیشگاه اونونده اولین شعار "مرگ بر آپارتاید" شعاری اولوب و اونون سویله یه نی ده بللی دیر. هله لیک اونون دا آدلی گیزلی ساخلانیر اما اوردا اولان قدیمی فعال اویرنجی لر بونلارین آدلارین بیلیرلر.

جناب امانی اویرنجی دونملرینین ساده جه سون ایلینده چوخ محدود شکیلده فعال اویرنجی لرله لرتباطی اولوب و هئچ زامان نسبی و یا غیر نسبی "محوریت" ی اولماییب. اویرنجی گونونده جامعه اسلامی تشکیلاتینا نوفوذ ائده ن آذربایجانلی اویرنجی لر، جامعه اسلامی امضاسی ایله بیر بیانیه یازاراق بیلیم یوردوندا داغیدیب لار. بو مسئله ده ده جناب امانی نین هئچ بیر رولو اولماییب. جامعه اسلامی نین او زامانکی رئیسی بیگ مرادی آدلی بیر فارس رزمنده اویرنجی اولوب دور. جناب امانی اعتراض متینگ لری ایله تشکیل تاپان گیزلی توپلانتی لارین هئچ بیرینده اشتراکی اولماییب.

جناب امانی نین میلی حرکته قاتیلماسی بئله اولوب کی؛ ایلک دفعه اولاراق بیر قدیمی اویرنجی اونو 1374 ینجی ایلین سونوندا (قیش آیلاریندا) مجلیس سئچیم لری آدایی دوکتور محمودعلی چهرگانی نین ولیعصرده اولان آپارتمانینا آپاریب و اورادا امانی جانابلاری نی اونونلا تانیش ائدیب. ایلک توپلانتی دا امانی بی اویرنجی لرین ایچینده دانیشیب و آدای دان حمایه ائدیب. جناب امانی بو دونملرده حتی چهرگانی بی ین سئچیم ستادیندا دا اولماییب و اوردا هئچ بیر رولو و وظیفه سی اولماییب. دئمک کی 1375 ینجی ایلین ایکینجی دونم سئچیملرینه قده ر جناب امانی نه فعال اویرنجی و نه ده فعال حرکتچی اولاراق تانیملانماییب. دئمک ایکینجی دونم سئچیملرده ن سونرا و حوکمت طرفینده ن دوکتور چهرگانی نین آدایلیغی قالدیریلدیقدان سونرایا قده ر امانی نی تانیان چوخ آزدیر. 1375 ده امانی بی لیسانسی آلدیقدان سونرا، دوکتور چهرگانلی طرفینده ن محبتله قارشیلانیر و دوکتور بی اونو مهندس اولاراق هر کسه تانیدیر. سونرالار جناب امانی آدای ین ان یاخین دوستلاریندان بیری اولوب و هر زامان اونون یانیندا اولوب. رحمتلیک دوکتور نطقی نین آغیرلاما توره نینیده جناب امانی نین اوزون ساچلاری ایله دوکتور چهرگانی یه قوروماجی اولاراق اشتراک ائتمه سی هر کسین یادیندادیر. جناب امانی هله ده تماما اوستو آچیق اولمایان بیر آلیش-وئریش مسئله سینده قوربانی اولاراق زندانا گئدیب. جناب امانی نین آذربایجانچی اولماسی دانیلمازدیر. آنجاق اساس زندان مسئله سی اونون پاک دویغولاریندان سو استفاده سونوجو مئیدانا گلیب. یوخسا جناب امانی بئش ایللیک بیر زندانی اولمامالی ایدیر.

اوچ- گوناز تی وی آذربایجان ین میللی موباریزه سی یولوندا و اوزه للیکله خورداد قیامیندا چوخ بویوک رولو اولوب. چوخ چتینلیک لر ایچره دوام ائده ن بو تلویزیون کسینلیک له خطاسیز دئییل دیر. آنجاق بو تی وی بللی بیر گوروهون موصادره چی لیک، غیر دمکراتیک و بایراق آنلایشی قارشیسیندا دوردوغو اوچون بعضی لرینین غضبینه سبب اولوب. بو تلویزیون دا بوتون گروهلارا دانیشماق فرصتی وئریبلیب، آنجاق بعضی لری تماما حرکتی موصادره یه قالخیب لار و طبیعی کی ملتیمیزین ایسته دیگی کیمی میللی حرکتده منم منم لرین قارشی سی آلینمالی دیر. گوناز تی وی منم منم لرین قارشیسندا دوردوغو اوچون بو قده ر مظلوم واقع اولوب و بونو هر کس بیلیر. جناب امانی نین بئله بیر گروها یاخین اولماسی و حتی بو گروهون اویرنجی قانادی ایله موصاحیبه سی ایسه بو دوغرولتودا اولوب و بونو بوتون میللی فعالار بیلیر.

نتیجه: ملتیمیز میللی موباریزلرینه احترام قویمالی دیر و احترامدا قویایجاق، آنجاق ملتیمیزین متواضع لیگینده ن سو استفاده ائدیب تاریخی تحریف ائتمک بیر میللی فعاللا یاراشماز. بو یازی ساده جه تاریخین تحریفینین قاباغی آلینماسی آماجی ایله یازیلب. یازارین جناب امانی ایله هئچ بیر شخصی مسئله سی یوخدور و اونا احترام قویماغی اوزونه بیر وظیفه بیلیر. آما هر کس بونو بیلمه لی دیرکی میللی هدفلریمیزی یالانلاردان و اخلاق سیز دوارانیشلاردان اوزاق توتمالی ییق. یوخسا چالادان چیخیب قویویا دوشمه احتمالیمیز واردیر.