آذربایجان اویرنجی حرکاتی
گله جک بیزیمدیر azoyrenci_herekati@yahoo.comآذربایجان اویرنجی حرکاتی
گله جک بیزیمدیر azoyrenci_herekati@yahoo.comیئنی بیر کیتاب
یئنی بیر کیتاب
معیار دیل
آذربایجان اویرنجی حرکاتی : ایواز طاهانین «معیار دیل» آدلی کیتابچاسی ایشیق اؤزو گؤردو. بو اثر تیر آیی‌نین اونوندان هله‌لیک تبریز، تهران و زنجاندا ساتیشدا اولاجاق. موللیف بو کیتابدا معیار دیلین گئرچکلشمه‌سینی انگلله‌ین مانعه‌لری آراشدیریر، بعضی اؤنه‌ری‌لر ایره‌لی سورور. کیچیک حجملی بو کیتابدا آشاغیداکی مؤوضوع‌لار اینجه‌له‌نیر:
ـ تاریخی سیناقدان قارماقاریشیق یازی آخین‌لاریناجان
ـ آغیز دیلی و میللی دوشونوش
ـ معیار دیل و شعریمیزین نثره اوستونلویو
ـ یئرلی رادیو و تلویزیون‌لارین جالاق دیلی
ـ اینتئرنئت؛ منفی و مثبت ائتکی‌لر
ـ معیار دیل و چئشیدلی یازی آخیم‌لاری
ـ گراماتیکایا دؤنوش
ـ بیزده ایصطیلاح یوخسوللوغو وار
کیتابین « اینتئرنئت؛ منفی و مثبت ائتکی‌لر» باشلیقلی بؤلمه‌سینده دئییلیر: «مکانا، زامانا و گؤؤده‌یه غلبه قازانماق بشرین اسکی دیله‌یی‌دیر. گؤز قیریپیمیندا گون‌چیخاندان گون‌باتانا گئتمک، زامانی حرکتدن ساخلاماق و گؤوده [جسم] زیندانیندان آزاد اولاراق روح کیمی گؤی‌لرده اوچماق. بو، دیریلیک سویونو آختارماق کیمی بیر شئی‌دیر. اینتئرنئت بیزی بو کؤهنه دیله‌یه قووشدورورمو؟ اینتئرنئت زامان مسافه‌سی و مکان اوچورومو آنلاییش‌لارینی بایاغی بیر مسئله‌یه چئویردی. اینسان‌لارا تحمیل اولونموش اینفورماسیا قاداغالارینی گؤتوردو؛ دیل، دین و دوشونجه آزادلیغینی گتیردی. آنجاق اینتئرنئتین پروبلئمی اونون ان گؤزه‌ل اؤزه‌للییینده‌یر: گؤوده‌سیزلیک. اینتئرنئت گؤوده‌سیز روح‌لارین ویرتوال [مجازی] فضاسی‌دیر، بئیین‌لرین اوزاق انگین‌لیک‌لرده دجللیک‌له قاناد چالماسی. پروبلئم ده بوردان باشلانیر. بوردا بدن هئچ بیر تهلوکه دویمادان بیلیک قازانیر. سانکی ایکی‌چارخلی [دوچرخه] سورمه‌یی یالنیز نظری باخیمدان اؤیره‌نیر. بیلدیییمیز کیمی، یالنیز نظری بیلیک ایکی‌چارخلی سورمه‌یه کیفایت ائتمیر. چونکی ائله بیر آراجی معین بیلیک قازاندیقان سونرا آردیجیل مینیب ییخیلماق‌لا اؤیرنمک اولار. بدن تهلوکه‌یه دوشمه‌دن اینسان اؤزونون گئرچک فیزیکی دونیاسی باره‌ده یئترینجه تجروبه قازانا بیلمز. اینتئرنئت حاققیندا بئله بیر یوزوم‌لار نیچه‌دن گلمه‌دیر. نیچه‌یه گؤره، گؤوده‌لریمیزین بو عالمده حسی و شهودی باجاریق‌لاری دوشونجه آکسیاسی اوچون اؤنملی‌دیر. دیل اوچون ده بئله‌دیر. بو گؤوده‌سیزلیک هم تهلوکه‌سیز تانینمازلیغا گتیریب چیخیاریر، هم فایداسیز و دلیجه آختاریش خسته‌لییینه، هم ده قولایلیقلا یالان دانیشماغا. بونلارین هر اوچو ده مسئولیت و عؤهده‌لییی ضعیفله‌دیر. بو شبکه‌ده هم عؤهده‌لییه بویون قویماق، هم ده عؤهده‌لیکدن بویون قاچیرماق قولایلیقلا باش وئریر... او بیری یاندان، یالان (=اوبئکتیو قارشیلیغی اولمایان) بیلگینی یایماق‌لا اینتئرنئت اؤز آیاغی‌نین آلتینی قازیر. بو دا مرکزچیل گوج‌لره گؤیدن دوشمه‌دیر. چونکی اونا اسناد وئریلن یالان‌لار، اونون تؤره‌تدییی گئرچک فاجیعه‌لرله باغلی دوزگون بیلگی‌لره ده اینامی ایتیریر. یالانچی چوبان جاناوارین علیهینه دوز دانیشاندا دا اینانان اولمایاجاق...»
yarpaqnews@gmail.com
کیتابی پست واسیطه‌سی ایله الده ائتمک ایسته‌ین‌لر ایمئیلیمیزله علاقه ساخلایا بیلرلر.
