منیم میللتیمین قادینی

منیم میللتیمین قادینی

آذربایجان اویرنجی حرکاتی : بیر ساده عملیات کئچیرمک مجبوریتینده قالدیم. اورمو شهری نین دئولتی خسته خانالارینین بیرینده یاتیردیلار منی. عملیات کئچیردییم گونون آخشامیسی بیزیم اوتاغا ، باشقا بیر خسته نی عملیات اوتاغیندان چیخاریب، گتیردیلر. ایکی گنج اوغلان بیر قوجا قادینی گتیریب، تخت اوستده یاتیرتدیلار. (بیلمه دیم اوغوللاری ایدی یوخسا نوه لری). سونرا اونلار گئدیب، گئجه نی بو قوجا خانیمین یانیندا قالماق اوچون بیر گنج قادین گلدی. اونون گلینی ایدی. ائولی و آنا اولدوغونا باخمایاراق گنج (23-24یاشلی) اولدوغو بللی ایدی. آرتیق او گئجه اونلارا عایید هئچ نه بیلمه دیم.

صاباحیسی بو گنج قادینین ، منیم آنام و اؤز قایناناسی ایله دانیشیقلارینی دویدوقدا قاراداغلی اولدوغونو ظن ائتدیم. فضوللوق اولماسین دییه اوتاقدا اولان باشقا ایکی خسته قادیندان ( بیری کورد قادین و بیری ایسه همن بو دئدییم قوجا قادین) هئچ نه سوروشموردوم. اما قاراداغ بؤلگه سینه  اولان سئوگیمه گؤره بو قادینلا تانیشماغا ماراقلاندیم. هارالی اولدوغونو سوروشدوم. اوجا سسله و هئچ چکینمه دن " بیز قاراداغلی ییق" دئدی. ( بیر حالدا کی بعضاً اورمودا اولان قاراداغلی لارین، قاراداغلی اولدوقلاریندان چکینمکلرینی گؤرموشم).

"قاراداغین هاراسیندان سیز؟" دییه سوردوم. قایناناسی اونو قاباقلایاراق، بلکه ده بیرآز آجیقلی " بیز کوشتارگاه طرفینده ایلشه ریک..." دییه جوابلادی. داها هئچ نه سوروشمادیم. اؤزومله آپاردیغیم فمینیزمه عایید بیر کیتابی یئنی دن الیمه آلیب، اوخوماغینا داوام وئردیم. ناهارا یاخین ایدی. یئنه گؤزوم دوشدو بو گنج قادینا، دوشوندوم کی بو دونن بورا گلندن بری هئچ نه یئمه ییب، قوهوملاریندان ایسه هئچ کیمسه اونلارا باش وورماغا گلمه ییب، اصرارلا اوندان ایسته دیم منه گتیریلن مئیوه لردن یئسین. اؤزونه بو قدر اهمیت سیز اولدوغوندان سیخیلیردیم. گؤرموشدوم کی گئجه نی ده بیر ملفه سالیب، یئرده یاتمیشدی. منیم اصراریما گؤره بیر هولو گؤتوروب ، یار-یاریمچیق یئدی. منسه کیتابیما قاییتدیم. بیر آز کئچدیکدن سونرا تختیمه یاخینلاشیب، " نه کیتابی اوخویورسان؟" دییه سوردو. اونون بو سورغوسوندان دولایی دوشوندوم کی ، بو کیتاب بهانه سیله اونا قادینچیلیق و قادین حاقلاریندان دانیشا بیله رم. بیر سنتی قادین اولدوغونا گؤره فمنیسم کلمه سیله تانیش اولمادیغینی احتمال وئریردیم. ( نئجه کی بیر چوخ یونیوئرسیته کئچیرمیش قیزلاریمیزدا بو کلمه ایله تانیشلیقلاری یوخدور) کیتابین جیلدی نی اونا گؤسترب، کیتابین عنوانی نی اوخوماغینی گؤزله دیم. بیر کیتابا باخیب، بیر منه باخدی. بیرآز توموب ، اوزگون و یاواش سسله دئدی: " من اوخویا بیلمه رم کی، منیم هئچ ساوادیم یوخدور. حتی نومره لری ده بیلمیرم. فارسجادان باشیم چیخمیر...". بیر آن دئمه یه هئچ نه تاپمادیم. اوزونه باخیب، تئز اؤزومو ییغیشدیریب، لحنیمین نورمال اولماغینا چالیشدیم. دئدیم: " حتماً بالاجا کندده اولدوغووا گؤره قویماییبلار اوخویاسان؟" ، تئز دئدی:" یوخ آنالیغیم قویماییب اوخویام، ایندی باشلامیشام نهضته گئدیرم..." .

آرتیق نه دن دانیشا بیلردیم؟! ساده جه اونو اوخوماغا و اؤیرنمه یه آلقیشلادیم. دئدیم کی هله گئج اولماییب و ائلییه بیلر درسینی اوخوسون. دئدیم کی بیرآز ائو ایشینه واخت آییرماق یئرینه درسینه واخت آییرسا ، چوخ راحات دیپلوما کیمی اوخویابیلر. سؤزلریمی تصدیقلدیکدن سونرا دئدی: " آخی اولمور کی ، چتین دیر، مستاجیرچی لیک، ائو ایشی، اوشاق، آخی من فرش ده توخویارام. بیزیم گلیریمیز منیمله یولداشیمین فرش توخوماغینداندیر، بونلارینان داها درسه نه واخت قالیر نه حؤصله....".

مینا د.

گونئی آذربایجان اویرنجی قادینچیلار