İran Azərbaycanın lehinə səs verməyib

İran Azərbaycanın lehinə səs verməyib

AZerbaycan Oyrenci Hertekati: ATƏT-in Minsk qrupu həmsədrlərinin Azərbaycanda keçirdikləri görüşlər zamanı ölkəmizin Dağlıq Qarabağ münaqişəsi ilə bağlı mövqeyi bir daha onların diqqətinə çatdırıldı. Bu mövqe isə ondan ibarətdir ki, Qarabağ münaqişəsi yalnız Azərbaycanın ərazi bütövlüyü çərçivəsində həll oluna bilər. Biz həmsədrlərin Ermənistan tərəfini konstruktivliyə çağırmalarını gözləyirik" ...

 Bu bəyanatla dünən keçirdiyi həftəlik brifinqdə Xarici İşlər Nazirliyinin mətbuat katibi Xəzər İbrahim çıxış edib. O bildirib ki, rəsmi Bakı həmsədrlərlə işini davam etdirir. Minsk qrupunun fransalı həmsədri Bernar Fasyenin "Madrid təkliflərinin yaxşılaşdırılması üzərinə iş gedir" açıqlamasına münasibət bildirən X.İbrahim deyib ki, sözügedən təkliflərə Azərbaycan öz münasibətini bildirib, şərhlərini verib: "Ümumi qərarımız var. Bu qərar isə Azərbaycanın ərazi bütövlüyü çərçivəsindən kənarda münaqişənin həllinin olmaması ilə bağlıdır".

  "Həmsədrlərin işğal olunmuş Azərbaycan ərazilərinə səfərlərinin Dağlıq Qarabağın danışıqlarda tərəf kimi iştirakı istiqamətində addım kimi qiymətləndirilə bilərmi" sualına cavab olaraq X.İbrahim deyib ki, Qarabağın iki icması var - Azərbaycan və erməni icması: "Ermənistan tərəfi Qarabağın yalnız bir icmasının olması barədə beynəlxalq ictimaiyyəti yanlış istiqamətə yönəltmək istəyir. Hazırda icmaların danışıqlara qoşulmasından söhbət getmir. Ermənistan silahlı qüvvələri Azərbaycan ərazisindən çıxdıqdan, məcburi köçkünlər öz yurdlarına qayıtdıqdan sonra icmaların prosesə qoşulması müzakirə mövzusu ola bilər".

  X.İbrahim həmsədrlərin Xankəndinə Ermənistandan keçərək səfər etmələrini onların xüsusi statusları ilə əlaqələndirib. Əlavə edib ki, məhz buna görə həmsədrlərin Ermənistandan Xankəndinə getməsi mümkün olub: "Amma təbii ki, bu barədə əvvəlcədən Azərbaycan tərəfinə məlumat verilib". Ermənistanın xarici işlər naziri Edvard Nalbandiyanın Azərbaycanın hərbi çağırışlarının sülh prosesinə mənfi təsir etməsi barədə bəyanatına şərh verən X.İbrahim deyib ki, Azərbaycanın həmin bəyanatları reallığı əks etdirir: "Azərbaycan inkişaf edən dövlətdir. Ölkədə bütün istiqamətlərdə potensial genişlənir. Prezidentin iyunun 26-da hərbi paradda söylədiyi kimi Azərbaycan öz ərazi bütövlüyünü bərpa edəcək. Bunu hansı yolla etməsi isə Azərbaycanın öz seçimidir. Bu seçim beynəlxalq normalar çərçivəsində olacaq". Rusiya ilə Ermənistan arasında münasibətlərin, hərbi əməkdaşlığın möhkəmlənməsinə diqqət çəkən diplomat deyib ki, Rusiya özünün beynəlxalq statusunu nəzərə alaraq Ermənistanla əməkdaşlığın digər dövlətlərə və Azərbaycana yönəlməməsi üçün səylər göstərməlidir.

  XİN rəsmisi İranın Qarabağ münaqişəsinin həllində roluna da toxunub. BMT Baş Assambleyasında keçirilən səsvermədən sonra İran BMT katibliyinə məktub göndərib ki, onun mövqeyi səhv anlaşılıb. İranın Azərbaycanın lehinə səs vermədiyini söyləyən X.İbrahim deyib ki, bu dövlət Azərbaycanın ərazi bütövlüyünü tanıdığını bəyan edir: "Amma Azərbaycanın ərazi bütövlüyünün bərpası ilə bağlı bəyanatlar versə, daha səmimi olar".

   X.İbrahim rəsmi Bakının Gürcüstan-Rusiya münasibətlərinin kəskinləşməsi ilə bağlı mövqeyini də açıqlayıb: "Azərbaycan dəfələrlə bəyan edib, GUAM-ın sənədlərində də var ki, bu çərçivədə mövcud münaqişələri dövlətlərin ərazi bütövlüyü çərçivəsində həllinin tərəfdarıdır. Hansısa problemin və gərginliyin yaranması ikitərəfli, beynəlxalq və regional məsələlərə müsbət təsir etmir. Azərbaycan Gürcüstanın ərazi bütövlüyünü tam dəstəkləyir".

   X.İbrahim ötən həftənin sonları Bakıda keçirilən Azərbaycan-ABŞ dialoqu barədə də danışıb. Deyib ki, demokratiya dialoqu çərçivəsində təkcə qarşıdan gələn prezident seçkiləri və mətbuat azadlığı məsələləri deyil, ümumiyyətlə demokratiya sahəsində müxtəlif məsələlər müzakirə olunub: "İki strateji dövlət arasında sayca altıncı olan bu dialoq dostluq şəraitində keçib".

   Xatırladaq ki, dialoqda ABŞ nümayəndə heyətinə dövlət katibinin demokratiya və insan haqları üzrə müavini Devid Kremer başçılıq edib. X.İbrahimin sözlərinə görə, tərəflər dialoq zamanı müxtəlif müzakirə obyekti olan məsələlərə mövqelərini bildiriblər. Azərbaycanda bütün sahələrdə islahatların davam etdiyini bildirən X.İbrahim deyib ki, bu, demokratiya məsələlərini də əhatə edir: "Azərbaycan dəfələrlə bəyan edib ki, seçkiləri ən yüksək səviyyədə keçirəcək. Mətbuat azadlığı sahəsində də işlərin tənzimlənməsi istiqamətində səylər göstərilir". Hər iki dövlətin dialoqu davam etdirmək fikrində olduğunu deyən X.İbrahim bildirib ki, Azərbaycan islahatları bundan sonra da həyata keçirəcək: "Bu islahatlar isə Azərbaycanın iradəsi və məqsədləri üzərində qurulur".

   ABŞ-ın prezident seçkilərinin keçirilməsi üçün Azərbaycana 3 milyon dollar ayırmasına gəlincə X.İbrahim ABŞ tərəfin belə bir bəyanatı olduğunu deyib. Əlavə edib ki, belə addım atılanda adətən, onun Azərbaycan qanunvericiliyinə uyğunluğu nəzərdən keçirilir: "Əgər bu, qanunvericilik çərçivəsində olacaqsa, o zaman heç bir problem görmürük". ABŞ səfiri Ənn Dersinin təhlükəsizlik məsləhətləşmələri zamanı Azərbaycanın NATO-ya üzvlüyü məsələsinin müzakirə olunacağına gəlincə X.İbrahim rəsmi Bakının adıçəkilən qurumla münasibətlərinin inkişaf etdiyini diqqətə çatdırıb. Deyib ki, NATO-nun müxtəlif proqramları çərçivəsində bu əməkdaşlıq inkişaf etməkdədir.(525ci)