بای بک سیته سینده اولان سورقولامانین سونوجو

بای بک سیته سینده اولان سورقولامانین سونوجو 

آذربایجان اویرنجی حرکاتی : بای بک سیته سی اینترنت ساهه سینده چالیشان آذربایجان اوچون یارانمیش، آذربایجانا دوشونن و یولوندان چاشمایان بیر دؤشرگه دیر. 

طبیعیدیر کی بیر ساهه ده چالیشانلار اوچون بیر چوخلو سورونلار یارانار. آنجاق، آذربایجان دونیانین آزاراق مودئرن اولکه لریندندیر کی اینتئرنئتده یئترینجه اینکیشاف ائتمییب. اینکیشاف ائتمه مگین ندنی ایسه، ایکییه بؤلونموش بیر اولکه نین عاصیمیلعاصییایا معروض قالماسیدیر. باشقا ندنیسه، یئترسیز ایستک، یارارسیز چالیشانلار و ساوادسیز یئتکیلیلر آدلاندیرماغ اولار. 

یئترسیز ایستک نه دئمکدیر؟ 

آذربایجانلی اولاراق اینتئرنئتده گزنده، روس و فارس دؤشرگه لرینده ساییسیز حسابسیز آذربایجانلییا راسلاماغ اولور. آنجاق، بونلاری تورک دؤشرگه لرینده تاپماغ مومکون دییل! 

یئترسیز چالیشانلار نه دئمکدیر؟ 

اینتئرنئت آرتیق بیر بیلیم اولاراق آلینیر. بو بیلیمی گئنیش چاپدا یایماق چوخ اؤنملیدیر. اینتئرنئت ایکینجی بیر دونیا اولاراق آدلانیر. بو دونیادا سؤز حاقیمیزین اولماسی اوچون، گئنیش چالیشمالیییق. هله کی  بارماغ ساییس چالیشان وار، اونلاریندا چلسف میللی هیسسلری آزدیر. بیز یا بیزه بنزر اوزمان اولمایانلارین چاباسی ایسه چوخ آز اتکیلی اولماقدادیر. ایران آدلانان اولکه ده سیته میزین فیلتئر اولماسیسا (۳ ایلدن آرتیقدیر کی بای بک ایراندا فیلتئردیر) ایشلریمیزین داها آز اتکیلی اولماسینا ندن اولور. 

ساوادسیز یئتکیلیلر کیملردیلر؟ 

او دانیشانلار کی کامپوتئرین نه اولدوغون بیلمییب، آنجاق میللی هرکاتا اینتئرنئت امنییتیندن دانیشیب و اونلاری قورخودانلاردیلار. ساوادسیزلار اونلاردیلار کی میللی هرکاتا یارانان آراجلاری دستکله مک یئرینه، اونلاری تخریب ائدیب و اونلاردان بیر یالانجیل قورخو یارادیرلار. تبیکی بیزیم دوشمانلار ایستییرلر کی بیزیم هرکاتیمیزا ضربه یئندیرسینلر. بو نورمال بیر اولایدیر، آما، ندن بیز اونلارا ضربه یئندیرمک یئرینه، اؤز آراجلاریمیزی داغیتاغ؟ 

بای بک ۵ ایل (۴ ایل دوزنلی) فعالیت گؤستریر. بو ایللر ایچینده، اینتئرنئت ساهه سینده بیر چوخلو ایلکه ایمضا آتیب. بای بک هر زامان آچؤق اولاراق هر تور بیلگی و یاردیم وئرمک اوچون حاضیر اولدوغون بیلدیریب. بیر چوخلو ایمکان یارادیب، بیر چوخلو آذربایجانلی فاللا یاردیمجی اولوب و ایچریده بیر سیرا ایشلملر یاپیب. بو اولایلارا شاهید، سیته نین فیلتئر اولماسینا باخمایاراق، سیته یه اولونان تخریبلره راغمن، بای بک هله ده اؤز میللی سییاستیله یولونا دوام ائتمکده دیر. 

سورقولاما ایدئاسی هاردان چیخدی؟ 

یوخاریدا آچیقلانان سورونلار و یئترسیزلیکلری گؤزده آلاراق، میللی هرکاتا ماراغ یاراتماغ و اینتئرنئتده گزن میللی دوشونجه یه صاحیب اولان و موخته لیف دوشونجه لر داشییان سویداشلارین گؤروشون توپلاماغ اؤنملی بیر ایشدیر. 

بو ایشه باشلامادان اؤنجه، گئچمیشده بیزه قارشی تخریبلری گؤزده آلاراق، ۱۵ گونلوک بیر سورقولاما و توپلام ۸۰ جاواب آلماغ آماجییلا سورقولامانی یاراتدیق. سورولارین سئچیلمه سی چوخ اؤنم داشیییردی. اونا گؤره، سورولارین بیزه یارارلی، آما، دوشمنه یارارسز اولدوقلارینا دیقت ائتدیک. سورولارین هئچبیری اؤزل دییل، شخصی بیلگیلر توپلامیر و عومومی سورونلارا توخونور. 

بیر چوخلو سویداش بیزه یازاراق سورقولامادا قارابغ یا کورد سورونونا توخوناراق اونلارین یئری نین بوش اولدوغون وورقولادیلار. اونلارا بیلدیردیک کی اینتئرنئتده، و حتّی رئال یاشامدا سویداشلاریمیز بو سورونلارلا تانیش دییللر. اونا گؤره، او سورولارا وئریلن جاواب داها چوخ گرچکدن اوزاق اولاجاقدیر.      

بیر داها اؤز اینانجیمیزی دئمک بلکی یارارلی اولور. میللی هرکات آدلانان یولدا اولانلارین بیر چوخو اینتئرنئته ال تاپا بیلیرلر. بونا باخیب و یوخاریدا آچیقلانان فاکتا باخاراق، ینی آذربایجانلیلارین اینتئرنئتده اینکیشاف ائتمه مه سینه باخاراق، دئمک میللی هرکات آدلاندیردیغیمیز، اونا گؤره داوراندیغیمیز و اوندان گؤزله دیکلریمیز یالنیز اینتئرنئتده مهدود اولمامالیدیر. میللی هرکاتیمیز اینتئرنئتده یئر آلماییبدیر، اینتئرنئت سادجه بیر آراجدیر. 

میللی دوشونجه نی یاراتماغ اوچون، ایکی سیته یا ۱۰ وبلاگ-لا ایش یاپماغ اولماز. گونده ۱ مقاله یازیب یا ۲ بیانات چیخاریب و یا ۳ شوعار وئرمکله میللی هرکات گوجلنمز. میللی هرکاتیمیز ایچریده و اؤرکلرده اولمالیدیر. سؤزون قیسساسی، اگر بیر سیرا قورخاغین اومودونا قالیب و میللی ساواشیمیزی مجازی دونیایا داشیساق، دئمک بیز یازیب و بیز اوخویاجاغیق، 

بای بک چالیشیب کی میللی بیلگیلر کاغاز اوزرینده، کیتاب شکلینده و یا فیلم اولاراق ایچریده یاییلسین. چتیندیر، آما ایستسک باشاراجاغیق، شاه دونمینده نئجه بیر ساوادسیز اکینچی، بیر دوکتور و بیر موهندیس خومئینی کاسئتلرین گیزلی اولاراق دینلییردی، نئجه کی  بیلدیریلر الدن-اله دولاشیردی و نئجه کی  پول توپلاما کاناللاری یارانمیشدی، بیزیم میللی هرکاتیمیزدا عئینی یولدان ایلرله مه لیدیر. اینتئرنئت هامیدا یوخ، میللی ماراخ هامیدا یوخ. سؤز ۵۰ میلییون آذربایجانلی تورکدن گئدیر. اونلارین ۴۰ میلییونو فارس و ۱۰ میلییونو روس کؤلگه سینده یاشاییر. 

سورقولامایا گلینجه، عومومی اولاراق ۸۰ یانیت توپلاماغ اوچون سورقولاما اینتئرنئته یوکلندی. ۱۵ گون ایچینده ۱۳۶ یانیت توپلاندی. بو اولای بیزی سئویندیردیش نومونه سورقولاما اولاراق، بو قدر جاوابی اینجله مک اوچون پلانیمیز یوخیدی. آما، یانیتلایانلاردان هیر داها تشککور ائده رک، سورقولامانین تام اینجله مه ایشینی میللی فاللاریمیزا بوراخیریق. بای بک اؤز گوروشون قیسسا اولاراق سیته یه آرتیراجاق. 

سون اولاراق، اینتئرنئت دونیاسین آشماغ لازیمدیر. بو دونیادان قورخمامالیییق. ساوادسیز اینسانلارا بیر داها سسله نیریک کی بوش یئره میلتین آراسیندا قورخو ترتمه سینلر. اگر شوبهنیز واردیرسا، آچیق اولاراق اعتیراض ائدیب و تهلوکه لی اولان ایشلملری آچیقلایین. آما، گیزلی-باغلی سؤزلر دئییب و میلته آماندیر سیته لره گیرمیین دئدیکلرینده، دئمک بیر تور اؤزوموزه ضربه یئندیریلیر. 

تئکنیکی باخیمیندان، بیری نین کامپوتئرینه گیرمک اوچون، اونا ویروس گؤندرمک بیله لازیم دییل. بیری نین کامپوتئرین بوشالتماغ اوچون اینتئرنئتدن آدرئس تاپماغ لازیم دییل. چوخلو یول واردیر کی اگر ایران حاکیمییتی ایستسه، او یوللار ایله هامینی ایزله یه بیلیر! آما، بو اولان ایشمیدیر؟ 

چوخلاری خاریجی اولکه لره گئتدیکدن سونرا میللی دوشونجه نی اؤیره نیبلر. او اینسانلار داها سونرا او اولکه لرین پولون آلاراق زامان الده ائدیبلر. چالیشمادان دئولتدن یاردیم آلان بو سویداشلار اؤزلرین بیر یوکسک سوییه لی سییاستچی گؤروب و تئررور! اولماقدان قورخویا قاپیلیبلار! ائله اونا گؤره دیر کی هرکسه شوبهه ایله یاناشیرلار، هامینی جاسوس یا خایین بیلیرلر، آنجاق اؤزلریده بیر ایش گرمه دن قورخو تؤره دیرلر! 

میللی هرکاتیمیزین کؤکو ایچریده دیر. اونا سو وئرمک، اونو قوروماق اینتئرنئت ایشی دییلدیر. 

بای بک قیسسا اولاراق ۱۳۶ نفرین وئردیگی یانیتلارا اینجله مه حاضیرلاییب. بو اینجله مه ساده شکیلده یازیلیب و اؤنملی اولان بؤلوملر سئچیلیب. 

سورقولامادان الده اولونان سونوجلارا باخاراق، آذربایجانلی سویداشلار (ئله ساناق) کی بای بک سیته سینی زیارت ائدیب و سورقولامانی جاوابلاییبلارین ۲۱.۳۲٪ یؤزده سی ۳۱-۳۵ یاشیناددیلار. یانی هرکاتیمیزین گئنج اولدوغو اینتئرنئتده بللی اولور. ۲۰-۲۵ یاشی اولانلار ایسه ۱۵.۴۴٪ فایز تشکیل ائدیبلر. 

یانیتلایانلارین چوخو اوغلان اولوب. بیر سیراسی بو سورویا جاواب وئرمکدن چکینیبلر. اگر اونون یاریسین قیز و یاریسین اوغلان بیلنده، ۵۹٪ اوغلان و ۴۱٪ قیز اینتئرنئته گلیبلر. یانی اوغلانلارین اینتئرنئتی قوللانماغ ایمکانلاری داها چوخدور. 

آذربایجاندا دوغولانلارین ساییسی ۱۱۸ نفر اولوب، آنجاق آذربایجاندا یاشایانلار ۵۴ نفردن اولوشوبلار. یانی، سورونلار ندنیله، آذربایجانی ترک ائدنلرین سایی اوردا یاشایانلاردان چوخ فرقلیدیر. و، ایچریدن اینتئرنئته گلنلرین ساییسی نین آز اولماسیدا میللی هرکاتین ایچریده سورونلارلا قارشی اولدوغون گؤزه چارپیر. 

تزییقه معروض قالانلار، و اونلار کی بیلیرلر تزییق ندیر ۸۸ نفر اولوب. ان چوخ اینجیدیکلریسه دیل باخیمیندان اولوب. یانی کی تورکجه دانیشماغ اوچون، یادا تورکجه لهجلری اولدوغو اوچون اینجیدیلیرلر. داها سونرا سوی باخیمیندان شیکایت ائدنلر چوخدور. ساده دئییشده، بونلاردان ۴۴ نفری هم تورکجه دانیشمالاری اوچون و همده تورک اولمالارینا گؤره تزییقه معروض قالیبلار. اوندان سونرا جینسییت ساییسی گلیر. یانی قیز یا اوغلان اولمالارینا گؤره اینجیدیلنلرین یؤزده سی ۱۸.۰۲٪ اولور. ایندیکی دوروما باخاندا، بونلار قیز اولمالیدیلار. دین باخیمیندان ازییت اولانلارین ساییسی ۳۰ نفردیر. 

اینتئرنئته گلنلرین ساوادلاری اورتالاما اولاراق اورتا اوخول اولور. 

۸۲٪ یؤزده  ایشله دیکلرین بیلدیریبلر. اورتا اوخول بیتیریب و چالیشان سویداشلارین آچیقلاماسیندان گؤرونور کی بیزیم توپلوم هم اوخویان و هم چالیشاندیلار. بونلارین بئینینه، یالنیز میللی دوشونجه آخمالیدیر. 

یاری-یاری اولاراق، تاریخیمیزی بیلنلر واردیلار. ۱۰۸ نفر آذربایجانین هارا و کیمین اولدوغون بیلدیریبلر. اونلارین ۵۷.۴۱٪ یؤزده سی  اینانیرلار کی ایندیکی قوزئی و گونئی آذربایجان تورپاغلاری بیرگه آذربایجاندیر و تورکوندور. ۲۹.۶۳ یؤزده  اینانیر کی خزر-دن عمان-آ، داشکند-دن آنادولو-یا قدر آذربایجاندیر و تورکوندور. 

تورک اولوسون اولماسینا اینانانلار ۷۷.۳۷٪ یؤزده دن اولوشوبلار. اونلار دئییر کی آذربایجانلی و تورکییه لی تورک ساییلیر. بو اولای بیلدیریر کی سویداشلاریمیز تورک تاریخیندن خبرلری آزدیر. ندن کی سورقولامادا یئرلشن لیسته نین هامه سی تورک سویوندان سئچیلیبلر. 

دئموکراسینی  "هرکسین سؤز و سس (رای/اوی) حاقی ائشیت اولسون"  بیلنلرین ساییسی ۵۰ نفر اولوب. بو گؤستریر کی سویداشلاریمیز چوخ اینسانی دوشونجه یه مالیکدیلر و هئچ آیریسئچکیلیک قویماغا اینانجلاری یوخدور. 

۱۱۰ نفر اینانیر کی بیر میلتین بیر دئولتی اولمالیدیر. بو سورو ایکی باخیمدان اینجلنمه لیدیر: ۱- گونئیده دئولت قورولماسی، ۲- گونئی و قوزئیین بیر دئولت بایراغی آلتیندا بیرلشمه سی. دئمک سویداشلارین چوخو اؤزگورلوک و بیرلشمکدن یانادیلار. بونلار اینانیرلار کی دئولتیمیز اؤزگور و باغیمسیز اولمالیدیر. ناراخلیدیر کی ۱۵.۴۵٪ یؤزده  آذربایجاندا کیررالیغین یارانماسین طلب ائدیرلر. 

عومومی سیاسی بیلینجین میلتیمیزده اولوب اولماماغی سوروسونا، ۳۶.۵۰٪ یؤزده  چوخ آزدیر یانیتی وئریبلر. ۲۳.۳۶٪ یؤزده سه یئترلی دییل دئییبلر. آما، ۱۴.۶۰٪ یؤزده  سویداشیمیز اینانیر کی میلتیمیزین سیاسی بیلیمی یوخدور. بو اولای بیزی دوشوندورمه لیدیر کی ندن گئچمیشده مودئرن و دئموکرات قالخیشلارا اؤندرلیک ائدن بیر بؤلگه ده یاشایانلارین بیلینجی آزالیب. 

سویداشلارین چوخو میللی دوشونجه سی نین یاییلماسین ایستییبلر. اونلارین ۳۹.۸۰٪ یؤزده ی دئییر کی مئدییا یاراتیلمالیدیر (کیتاب، قزئت، تلویزیون، رادیو، سیته و.س)! یوخاریدا یازیلدیغی کیمین، مئدییالارین چوخالماسی بیر گرکدیر. بونا مانعا یارادانلار یا اوندان قورخو یارادانلارین ایشلمینه سون وئرمک لازیمدیر. 

میللی دوشونجه نی یایماغ اوچون ۲۴.۹۱٪ یؤزده  هر یئرده دانیشاجاقلارین بیلدیریبلر. عومومی باخیشدا، قالان سویداشلاریمیز مئدییا و فیزیکی ایشدن سووای، هر تور یاردیما حاضیر اولدوقلارین بیلدیریبلر. 

۸۰ نفر بیلدیریب کی اؤلسه لرده میللی دوشونجه لرین دییشمیه جکلر. 

گؤستری یاپماغ اوچون گؤنوللو سویداشلارین ساییسی چوخ آزدیر، ینی یالنیز ۸ نفر بو باره ده حاضیر اولدوقلارین بیلدیریبلر. باشقالاریسا، گؤسترییه قاتیلمالارین موحافیزکارلیقلا بیلدیریبلر. 

میللی فعاللارین توتولماسین بیلدیرمک اوچون چوخلو سویداشیمیز راضی اولدوقلارین دئییبلر. اونلار بو ایشی یارارلی بیلیب و توتولانین جانین خیلاص ائده بیله جک قدر اؤنملی بیلیرلر. 

گلدیک سونا،

سورقولاما بیتدی، آنجاق اوندان آلیناجاق ایدئالار بیتمییب. اینجلمه لرین سونوجون میللی فاللاردان ائشیتمک ایستریک. اونلار قرار وئرمه لیدیلر کی میللی دوشونجه و تاریخیمیزین بیلمه سینده اولان قیریخ پارچانی نئجه یاپیشدیرماغ اولار. اونلار قرار وئره جکلر کی ایسته نیلن مئدییالار نئجه یارانا بیلر و.س.       

و، باشقا سورقولامالارین یارانماسی اوچون، پروقراملاماغ، یئرلشدیرمک و ایداره ائتمه سی اوچون حاضیر اولدوغوموزو بیلدیره رک، سیزلره بیرداها تشککور ائدیریک. 

بای بک 

۰۴/۰۷/۲۰۰۸