چوخ اوزوندورسا گئجه، سوندا سحر وار

چوخ اوزوندورسا گئجه، سوندا سحر وار         

آذربایجان اویرنجی حرکاتی : یاشادیغیمیز 21-جی عصرده دونیا اجتیماعیتی نین گوندمینده اینسان حقلری، شخصی آزادلیقلار، دوشونجه آزادلیغی، قادین حقلری، مئدیا آزادلیغی و بونلارلا یاناشی دؤولت-میللت کیمی سؤیلملر آغیرلیقلی اولاراق سؤز قونوسودور. بوتون ایره لیله میش توپلوملارین خالقلاری آراسیندا میللی موقدراتین تعین ائدیلمه سی آرتیق هر میللت اوچون دوغال بیر حق کیمی بیرلشمیش میللتلر تشکیلاتی و باشقا اولوسلار آراسی تشکیلاتلار طرفیندن تاتینمیشدیر و سؤمورگه چی، راسیست و توتالیتر رژیملر دونیانین سیاسی صحیفه سیندن سیلینمکده دیرلر...

بئله بیر زاماندا ایران اسلام جمهوریتی دیکتاتور، سؤمورگه چی و ماکیاولیستی دوشونجه لره دایاناراق فارس فاشیزمی محورلی سییاستلرله غیرفارس خالقلارین آنا دیلینده ایلکین و عالی تحصیل آلماق و اونون کیمی دوغال و ابتدایی حقلرینی بئله پوزاراق دونیا اجتیماعیتی نین تانیدیغی اینسانی پرینسیپلره قارشی گلمکده دیر.        گونئی آذربایجان تورک میللتی ایسه میللی اویانیش پروسه سینده دونیا سویه سینده آزاد بیر میللت اوچون تانینمیش حقوقو تانیماقدا و آرتیق الده ائتمکده دیر. گونئی آذربایجان میللی حرکتی ایسه اساسا آذربایجانلیلارین میللی منافعی نی بیرلشمیش میللتلر تشکیلاتی طرفیندن قبول ائدیلن حقلر چرچیوه سینده قورویان بیر سیویل حرکت کیمی گوندن گونه گلیشمکده و بو یولدا اوغورلو آددیملار آتماقدادیر.          هر زامان یاشادیغی بؤلگه نین  سیاسی اجتماعی گلیشمه سینده و آزادلیق موباریزه لری نین  فورمالاشماسیندا بؤیوک رولو اولان آذربایجان میللتی، 1385-جی ایلین خرداد آییندا معاصر کئچمیشینده دؤنوش نقطه سی یاراداراق میللی آزادلیق حرکاتی نین یئنی دؤورونو باشلاتدی. 10 گون ایچینده 25 شهری بوروین سیرا قییاملار میلتیمیزین، ایران حاکیمیتی طرفیندن اونلارا قارشی یورودولن 80 ایللیک سییاستینه سرت جاواب کیمی دونیا اجتماعیتی نین دقتینی گونئی آذربایجانا یؤنلتدی.                            10 گون بویونجا گونئی آذربایجانین بوتون شهر و کندلرینی آردیجیل اولاراق قاپسایان میللی اعتیراضلارین دالغاسی آذربایجان میللی حرکاتینا اونلارلا شهید قازاندیردی. حاکیمیتین بو مساله قارشیسیندا غیرانسانی توتومو، یوزلرجه اینسانین یارالانماسی و مینلرجه وطنداشیمیزین قانونسوزجا توتوقلانماسینا ندن اولدو.       بیر حالدا خرداد قیاملاری نین ایکینجی ایل دؤنومونه یاخینلاشماقداییق کی میلتیمیزین اوزرینده اولان باسقیلار دایانمادان آرتماقدادیر. بئله بیر وضعیتده بوتون میللی فعاللارین یاشادیغی بؤلگه نین وضعیتینه اویغون اولاراق، بؤیوک میللی قیامیمیزی تاریخی یادداشیمیزدا یاشاتماق اوغرونداکی چالیشمالارینی دستکله ییب اونلارا باشاریلار دیله ییریک.           شهیدلریمیزین اولو خاطیره سینی عزیزله ییب عایله لرینه و میلتیمیزه باش ساغلیغی دیلیه رک، تئهراندا یاشایان گونئی آذربایجان میللی حرکاتی نین فعاللاری اولاراق آشاغیدا گلن ایستکلرین یئرینه یئتیریلمه سینی ایسته ییریک:         1) سیویل اعتیراضلاردا ایشتیراک ائدن گوناهسیز اینسانلارا گولـله آچانلارین عادل محکمه لرجه جزالاندیریلماسی.         2) گونئی آذربایجان مساله سی نین دونیا آذربایجانلیلار طرفیندن اینسان حقلری مدافعه  کمیته لرینده قالدیریلماسی.        3) ایران گوونلیک گوجلری چرچیوه سینده چالیشان آذربایجانلی عسگر و پولیسی نین میللی حرکاتا سایغی ایله یاناشماسی.        4)  آذربایجانین یازیچیلاری و ضیالیلاری نین قلمی ایله بو اولایلارین یازیلیب سندلشدیریلمه سی.         5) بو کیمی حادیثه لری خبر آژانسلاری طرفیندن اولدوغو کیمی دونیایا چاتدیریلماسی.        6) آذربایجان سیاسی محبوسلاری نین قید شرطسیز آزادلیغا بوراخیلماسی.          گونئی آذربایجان میللی حرکاتی - تهران