هله ده اینانا بیلمیرم، تبریز یونیوئرسیته سی نی سیزسیز دوشونمک آن

هله ده اینانا بیلمیرم، تبریز یونیوئرسیته سی نی سیزسیز دوشونمک آنلامسیز گلیر منه سانکی...

سجاد بیی؟ آیدینی؟ فرازی؟؟ اؤنجه هانکینیزی دوشونوم؟ فرازلا تارتیشدیغیم آنلاریمی؟ آیدینلا شوخلوقلاشدیغیم گونلریمی؟ و یا سجاد بی دن اؤیرندیکلریمی؟

سجاد بیین منطیقی و آرامیشلی دانیشیقلاری قولاغیمدان کسیلمیر...

یوکسک لیسانس اؤیرنجیسی اولدوغونا باخمایاراق، منی بیرینجی ایلیمده اوقدر حوصله لی قارشیلادیغی... آرتیق تانیشدیقجا نه قدر سئویملی اینسان اولدوغو...!

دوشوندوکجه خاطیره لر یورویور بئینیمه...

سانکی ان سئویملی اؤیرتمنیم توتولوب، آرامیزدا اولان دوستلوق و صمیمیت دن دولایی اونا اولان سایغیمین اؤلچوسونو ایتیرمیشدیم، دوشوندوکجه سایغیم یوکسه لیر سانکی... هر اوچونه ده.

اونلارلا یاشادیغیم آنلارین هر بیرینی اؤنجه دن فرقلی گؤرورم بو گون.... بلکه ده بیرچوخوسوندان یئنی شئیلر اؤیرنیرم.. .

من قالیرام و خاطیره لر...!

ایندیکی کیمی گؤزومون اؤنونده دیر. ائلمان نوری نین آتا-آناسینین گؤروشوندن قاییدارکن بیی بیرآن چوخ توتقون گؤردوم، سانکی اوره یی دولموش کیمی ایدی. ائلمانا داریخیبسان دییه سوردوم. اوزومه گولومسه یه رک، بؤیوک قارداشین کیچیک قارداشینا سوندوغو محبت کیمی الینی چیینیمه قویوب:

 "ائلمانا داریخمیشام اما داها چوخ ائلمانا قیسقانیرام،  بیرده بیلیرسن ندن اوزولورم؟ ائلمانین آتا – آناسی ایله دانیشارکن حیس ائدیردیم اؤز – اؤزلریله بئله دوشونورلر کی من ایندییه کیمی توتولمامیشام دییه ، ائلمانین و عاییله سینین دورومون باشا دوشه بیلمیرم، البته کی حاقلی دیرلار..."

او زامان دینله دیم اما دوشونمه دیم اونون سؤزلرینه، ایندی ایسه فرازلا آیدینا اولان قیسقانجلیق حیسسیمه چوخ دوشونورم!

تونقا قاراچایلی