بو حئساب سوْرولاجاق... !
بیلمیرم بیلگین دوشمنین آجیغینی چیی دوستدان آچیم یاخود قانادلاری سیندیریلمیش قارتال یولداشلاریمی اؤزله ییم! بیلمیرم او اویانیش قوشلارین آنالارینین قانلی گؤز یاشلارینا دؤزوم یاخود دوه قوشولارین اوچابیلمزلیکلرینه گولومسه ییم! بیلمیرم بو سورونون ایتمیش ایپ اوجونو اؤز توخوما گؤمله ییمدن تاپیم یاخود پیتلاشیق ایپ اوجولارینی دویونلشدیریم!
آما سینیق قانادلارین دا بیر گون توختایاجاقلارینی هابئله آنالارین دردلرینین اورکلرینده قالماماسینا اینانیرام؛ اینانیرام کی یئنه ده بیر گون، قارتاللار دومان بوروموش ساوالانین زیروه سیندن، دوزلاقدا قاریلدایان قارا قارقالارین اوستونه یوروش آپاریب اونلاری «اح. اوْ.» سؤیله مگه زورلایاجاقلار. نهیسه قارتال اوچمایان داغدا قارقانین اوچاجاغی کسیندیر.
ساتقینلیق حئسابی، او قانلی گؤز یاشلارین آرازجا بیریکیب ائل اوچون سئللنمهسی ایله سورولاجاق؛ قارقالار دا لاشخوْرلار مئیدانینا داش آتیب سینسیجه آرالیقدان چرتهبیلمهیهجکلرینی بیلمه لی دیرلر. یئنی دونیادا اگلهشن کهلیک لر باشلارینی ریال لار ایله مانات لار کومه سیندن قالدیرسالار، اؤمورلرینین «آذگون» لوک شئیطان فهله سی اولدوقلارینی آیدینجا گؤره بیلرلر. قوشبازلار اویناتدیغی قاناریا دئدیگی کیمی، قارتاللار شاهی اؤزونو ریالا یوخ دوْلارا ساتدی، آما ایندی دوْلارا ساتیلان قارتال، فهله لر صفینده دوراراق باشقارقا دا هئچ پارا بیریمینی دنهمهمیش قویمادی. یازیقلار اولسون او ترسه یاندان چالینان زورنایا هابئله دومانلی ساوالانا تین سالان زهلهسیزلیک اوجاغینا، آما قارغیشا دا هئچ دیمه ز!
آهه منیم اینامداشلاریم! یئتیشین کی ساوالان دومانسیز، آراز سوسوز ایسه گونش آیدینلیقسیز قالمیش. کوچه لره سو سپمیشم، بلکه قارقالارین توزلاری یاتسین.
گؤزله ییرم او قارقانین دا بیر ایشله دیلمیش مندیل کیمی تاریخ زیبیل قابینا آتیلماسینی؛ آخی، گون گلر صفحه دؤنر، مجبور اولارسان ... !
تونقا قاراچایلی