توتون بیزی، هله ده قورخاجاقسینیز!

توتون بیزی، هله ده قورخاجاقسینیز!

آتیلا کیشی زاده

زنجیر، زنجیر یئنه ده زنجیر...

"عاشیق جنونو"، "بزیرگان"ین صاندیغیندا دوستاق ائدن ائله او ایدی. "ائیواز"ی "خوتکار"ین سارایندا ، "آلماس ایلدیریم"ی روس ایمپئریاسینین زیندانلاریندا، "قاچاق نبی"نی "قارایوردون" قازاماتلاریندا "خلیل رضا"نی روس شوونیزمینین "زهتابی" نی فارس شوونیزمینین، "عاشیق قشمی" ده "میشو" داغلاریندا ساخلادان دا ائله او ایدی. زنجیر زنجیر یئنه ده زنجیر...

دوغروسو زنجیرلرین اؤزوندن اؤنملی تاریخی دوشونجه¬میزه و ذهنییتیمیزه هوپان زنجیرلرین یول گؤستریجی طالعی¬دیر.

ناچالنیک، پریستاو گلنده کنده

اوبانی اویماغی چکیرلر بنده

دئیَن "عاشیق علسگر"دن توتموش،

بوردا بیر شئر داردا قالیب باغیریر

مروتسیز اینسانلاری چاغیریر،

یازان شهریارا قدر اوزانیب گلن آجی شیرینلی همن طالع!

تؤکدوکجه قانینی اول قاشین آستان ایچر

بیر یئرده¬یم اسیر کی تورپاغی قان ایچر

دئیه دئیه هؤنکورن فضولی¬دن توتموش،

داغلار یئرده دوستاقدیر

اولدوزلار کهکشاندا

قایالار چمبرینده، دوستاق دنیزلره باخ

دئیه-دئیه آزادلیق دئییب جان دئین خلیل رضا اولو تورکه قدر زنجیر طالعی چمبرینده چیرم- چیلپاق چیرپینان آزادلیق یئریکلی بیر تورپاق،

بؤیله دیر "عاشیق جنون"دان، "خان ائیواز"دان، "آلماس ایلدیریم"دان، "قاچاق نبی"، "دده علسگر"، "مولانا محمد فضولی" و "خلیل رضا"دان توتموش"ابوالفضل ائلچی¬ بَی" مکتبی¬نین، مکتبلی¬لری، سجاد رادمهر، ائلچین حاتمی، آراز زهتاب، آیدین خواجه¬ای، حمید والایی، ودود اسدی و.... یه قدر خیسین- خیسین سورونوب گلن او زنجیرین، او زنجیرلی طالعین بیر علتی، بیر دَبردیجی¬سی، بیر گؤسترگه سی وار او دا بیزده کی آزادلیق عشقی قورتولوش یانقی¬ سی¬دیر. بو یولون باشلانغیجی زنجیر ایدی سه سونو، آزادلیق دیر هم ده قورتولوش عطیرلی بیر چام اورمانلیغیندا قوراجاغیمیز باغیمسیزلیق قورولتایی دیر.

و سیز ای قارا قازاماتلارین مکیرلی باشقانلاری، بیر گون ائله اؤزونوزون محبس لرینیزین دیوارلارینین چارتلاغیندان باشلایاجاق دیر او  اینسان سئل لری و سئللول لارینیزین دمیر پنجره لرینین آرخاسیندا باش توتاجاقدیر او شانلی گؤروشمه لر "عاشیق جونونو"نو،  "بزیرگان"ین، "خلیل رضا"سینی، "لئفوتوو زیندانین"دان و "صفرخان"ینی "قصر"ین محبس لریندن قورتاران بیر خردادلی تورک ائللی لر آلوولار پؤسکوره جکدیر وئرانلیق لارینیزا. دده "شهریار"یمیز بونو چوخ اؤنجه دن اؤیرتمیشدیر بیزه:

بوردان دا من تئز مطلبه چاتمارام.