بؤیوک بی رسول اوغلو ایله موصاحیبه

بؤیوک بی رسول اوغلو ایله موصاحیبه

 1- سایین بؤیوک بی سیز اوجمله انسانلاردانسینیز کی باتی آذربایجان میللی مودافیعه کمیته سی یارانان دان بری همشه اونون یانیندا اولوب و حمایت ائدیردینیز . بو حیمایت لرین ندنین اوخوجولاریمیزا آچیقلییا بیلرسینیز می؟

تاریخ دن درس آلمییان میللت گئچمیش خطالارینی تیکرار ائده جک دیر.بو ایری بوروق یولدا حرکت ائدن میللی قاطارلارین سهوی اونلارین آشیب یوخ اولاجاقلاری ایله نتیجه له نه بیلر.باتی آذربایجان دا ائرمنی و کورد مسئله سی ایله باغلی 1993 – ده تهران دا عرب البیفباسیندا حاضیرلاییب چاپ ائتدیردیگیم ، " قانلی سنه لر" کیتابینا یازدیغیم گیریش بؤلمه سینده تاریخی سندلره دایاناراق توخونموشدوم.اورادا گئنیش صورشرح ائتدیگیم کیمی من تبریزده آنادان اولسام دا 12-13 یاشلاریمدا اورموداکی توپراق وارلیغیمیزی ندن ایله اورایا کؤچوب و " قارا حسنلی " کندینده یاشامالی اولموشام.او زامان یعنی 1334 – ده (1955) ایکینجی دونیا موحاریبه سیندن آنجاق 7- 8 ایل گئچیردی و کورد تالانلاریندا خالقین باشینا گتیریلن بلالاردان خالق هله ده آغلییا – آغلییا دانیشیردی.کندیلردن چوخلو آجی خاطیرلر ائشیتدیگیمی و کورد تالانچی لاری نین قارشیندا تک باشینا دایاناراق کندی قورویان ، هله او واخت یاشایان کلبه جانعلی امینی نین قهرمانلیقلاریندان او گیریش سؤزونده گئنیش یازدیغیما گؤره واختیزی آلمیرام.سونرالار ، جانیمدان چوخ سئودیگیم اورمو تاریخینی آراشدیرارکن بو نجیب میللتین باشینا گلن بلالارین اساس ایکی سببینی آنلادیم.  

2- جینابیز میللی شورانین مؤثر اویه لریندن سینیز.میللی شورادا باتی آذربایجان میللی مودافیعه کمیته سیندن حیمایت ائدیر می؟

بیلدیگینیز کیمی "میللی شورانی" یاراتماق یولوندا باشلاتدیغیمیز فعالیت موختلیف فیکیر و دوشونجه صاحیب لری نین بیر آرایا توپلانماسی ایله اولموشدور.طبیعی اولاراق آز فرقلی اولسادا آیری – آیری خطلرله باتی آذربایجان پروبلئمی نین حللینه دوشوننلر بعضی مقاملاردا عینی نظریه نی پایلاشمایا بیلر.آنجاق فیکریمجه دوستلاریمیزین هامی سی اؤز میللتینی مودافیعه ائتمک ده هم فیکردیر.بونا امین و آرخایینام کی میللی منافعیمیز تهلوکه قارشیسیندا قالارسا بوتون دوستلاریمیز ال – اله اونو قوروماق اوچون واحید بیر یوموروق اولاجاق دیر ، بو دفعه لرله ثبوت اولموشدور.

3-میللی حرکتیمیزده بیر تانینمیش فرد کیمین آیری چالیشان سییاسال قوروپلاریمیزا نه تاپشیریقلارینیز وار؟

بیلدیگینیز کیمی موختلیف سبب لر اوزوندن بعضی قوروپلار آراسیندا چئشیتلی آنجاق کیچیک پروبلم لر یاشاماقدادیر. ادعالار ، تحقیرلر- تحریفلر و بیر – بیرینی قبول ائتمه مه کیمی حاللار اولسادا ، منجه میللی حرکتیمیز بؤیوک بیر بیرلیک ایچه ریسینده دوام ائدیر.بو حرکتین گؤوده سی بونو دفعه لرله ثبوت ائتمیشدیر.آرتیق هر کس باشا دوشمه لیدیر کی ، بو بویدا حرکت کیمسه نین کنترلو آلتیندا اولاماز ، ساده جه سیستئم لازیم دیر، اونو فیکیرلشمک گره کیر.آذربایجان تورک میللتی بؤیوک سییاسی گئچمیشه مالیک دیر و اینسان و تشکیلاتلاری اونلارین عمل لری ایله ده یرلندیریر . من بو رنگارنگ لیغی میللی حرکتیمیزین دایاناقلیغی کیمی گؤرورم ، تخریبات لاری انگل کیمی باخیرام. خوشبختلیقدان سون زامان لار میللی قوه لر آراسیندا آپاریلان موذاکیره لر منطقی داورانیشلار چمبرینه گیرمیشدیر.هامیمیزین ادب و نزاکت اوصوللاری ایله بیر- بیریمیزله موذاکیره آپارماغیمیز، گونئی ده یاراناجاق هر هانسی بیر فرصتدن دوزگون ایستیفاده ائتمه ییمیز اوچون ایمکان یاراداجاقدیر.بودا بیر حقیقت دیر کی ، بؤیودویوموز محیطین،آلدیغیمیز تربیتین نتیجه سی اولاراق اکثریتیمیزده اوستونلوق حیس لری موجوددور.صبیر ، حوصله ومنطیق زاویه سی ایله باخاراق قبول ائتمه لیییک کی ، اسارت زنجیرلری هامیمیزینی یارالاماقدادیر.قورتولوشوموز ایسه بوتون میللتیمیزین آیاغا قالخماسی ایله هامیمیزین پایینا دوشه جکدیر.

4-سایین بؤیوک بی همیشه سیزین د یرلی اینتیقادلارینیز بیزلر اوچون یول گؤسته ریجی اولوب بو اوزدن باتی آذربایجان میللی مودافیعه کمیته سی نین ایش لری داهادا یاخشی ایره لی سورسون دییه نه تاپشیریقلارینیز وار؟

سیزین آپاردیغینیز سییاست حقیقتا تقدیره لاییق دیر.یاشار بی له آپاردیغینیز موصاحیبه ده قئید ائدیلن کمیته نین باشقا شهرلرده ده قورولاجاغی خبری ، گئنیشلنمنین اهمییتینی درکی نیزدن ایره لی گلیر و سئویندیریجی دیر.آنجاق ایندی کی شرایط ده امنییتی مسئله لری دیققت له گؤزدن گئچیرمک خطالاری آزالدیر.

باتی آذربایجان دا تئرور دسته لری نین آسان یول ایله قارشی سی نین آلینماسی حاقدا یایدیغینیز بیانییه چوخ ده یرلی بیر فیکیردیر.منجه بئله بیانییه لرین بیر آز قیسا اولماسی اوخویانی بیخدیرمییاجاغینا گؤره داها فایدالی اولار.

میثال اوچون املاکین ساتیلماماسی ، خبرلرین میللی مودافیعه کمیته سینه گؤنده ریلمه سی ، شوبهه لی دوروملارین ایزله نیلیب خبر وئریلمه سی کیمی مسئله لر آیری – آیری اعلامیه لرله وئریلیرسه داها ائتکین اولار.البته داخیلده بو ایشلرین یئرینه یئتیریلمه سی نین نه قدر چتین اولدوغو هامیمیزا آیدیندیر.

5- سایین بؤیوک بی سیز بیر فرد کی عؤمور بویو اینسان حاقلاری اؤزه للیک له آذربایجان اینسان حاقلاری اوغروندا چالیشیب سینیز و صیداقتینیز هامییا بللی دیر کورد تئروریسمی باشچیلارینا باتی آذربایجان توپراقلارینا اولان سالدیریجی باخیشلارینا نه سؤزونوز وار؟

بوتون اینسانلار ، دین ، میللییت ، جینسییت و باشقا فرقلیلیکله رینه باخمییاراق ، راحات و آزاد یاشاماسینی ، اؤز دیل ، مدنییت و کیملیک لرینی قورویاراق اینکیشافی ائتدیرمه له رینی ایسته می ین بیر شخصه اینسان دئمک ممکن دییل دیر.اینسانلارین و میللت لرین بو میللی وارلیقلارینی سالدیرانلار ، وطن آنلاییشی چرچیوه سینده توپراقلاریندا گؤزو اولانلارین قارشیسیندا ساواشیب حتی شهید اولمویانلاردا یوخاریداکی تعریفه لاییق اولارلار.اونون اوچون دور کی ، بیز دفعه لرله دئمیشیک و بیر داها تیکرار ائدیرم کی ، اؤزوموزه ایسته دیگیمیزی بوتون میللت لره ایسته ییریک .آنجاق میللی وارلیغیمیزی هدفه آلانلار و یا توپراغیمیزدا گؤزو اولانلارلا دا باریشماغیمیز ممکن دییل.

بیز اینسانلارا حریت ، میللت لره ایستیقلال شعارینی یارادان بؤیوک اؤنده ر محمد امین رسول زاده لرین اوولادلاری ییق ، ظلم ائتمز ، مظلوم اولماریق.بیریسی چیخیب سوروشا بیلر ، اوندا بو اسارت زنجیرلرینی بوینونوزدان نه اوچون آچا بیلمیرسینیز.اونا گؤره کی ، بیزیم کیملیگیمیزی بیزه اونوتدوروبلار، اوزون موددت یوخویا دالاراق و یا یالانچی تبلیغاتا آلداناراق هامییا دون تیکمیشیک اؤزوموزو دوشونمکدن اوزاق قالمیشیق .ترسه دؤنن بو دییرمانین اوست داشینی آرتیق دوغرو یؤنه سالماقداییق و نجاتیمیز یاخیندیر.

سیزین سؤالیزا بیر آز گئنیش جاواب وئرمک اوچون بیر ایکی خاطیره یه توخونماق ایستردیم. 1970- لرده پان تورکیست و سئپاراتچی ایتتیهامی ایله شاهین زیندانیندا اولان 4-5 جاوان ، سییاسی بنده وئریلدیکدن سونرا سراب ، تبریز ، سولدوزدان اولان سولچو بعضاده آما چوخ آز سایی دا اولان ایسلامچی قوروپلارلا او بندین موختلیف اودالاریندا یاشاییردیق.سول چیینیمیزده کی اودا دا ایسه سنندج دن اولان 4-5 کورسییاسی زیندانی سی ، ده یرلی بیر شخصیت اولان

جناب فلسفی آدیندا بیرینین اؤنده رلیگی ایله یاشاییردی.داواملی اوخویان ، گؤزو کیتابلاردا حقیقت آخداران بو اینسان و یانینداکی لار بیزیم تورکچو اولدوغوموزو بیلیر و مباحثه لر آپاریردیق .اوزون مدت بیر یئرده یاشاماغیمیزا باخمییاراق بو کورد اصیللی اینسان و یانینداکی لاردان منطقی داورانیش و دوزگون سییاسی آنالیزدن باشقا بیر شی گؤرمه دیک.

حال بئله ایکن ، او زامان 40-50 یاشلاریندا اولان اصلا تبریزین بستان آباد قصبه سیندن آنجاق چوخدان کرج ده یاشایان صابیر آدیندا بیر توده پارتییاسی منصوبو دا سییاسی زیندانی ایدی.

توده پارتییاسی نین کرج شهرینده کی گیزلین چاپخاناسی نین مسئولو کیمی سونرادان تانیدیغیمیز بو شخص و یانینداکی لاردان بعضی سی بیزلرین علیه اینه تورکچو و میللیت چی ایتتیهامی ایله او قدر تبلیغات آپاردی کی سییاسی ، زیندانیلر آراسیندا مرسوم اولان کوموندان دا بیزی چیخاردیلار.بو تورک اونلار ایسه کورد ایدیلر.شوبهه سیز ، او فیکیرده اولانلارین هامیسی دا اونون کیمی دوشونموردولر.اونلارلا بیرگه زیندان چکن و گئچمیشده دئموکرات فیرقه سی نین عضوو اولموش رحمتلیک ابوصالح به یین بیزی مودافیعه سینی شعرلریمده اوخشامیشام.

1363- جی ایل (1984) عزیز دوستوم مهندس یاسمی بی یین اورمونون جنوبوندا عراق – تورکیه سرحددینده یئرلشن زیوه قصبه سینده بیر مکتب بیناسی تیکمک مقاوله سی وار ایدی.منیم ده اورایا گئدیب ، برابر ایشین گئدیشاتینی و چاتیشمامازلیقلاری گؤرمه ییمی ایسته دی.اورالاردا دوز یئر یوخدور، ساده جه زیوه نین خرمن یئرلرینه فوتبال مئیدانی بویدا بیر دوزلوک وار.

بیر طرفده بؤیوک قهوه خانا میزلریندن بزنمیش ایستول آرخاسیندا مسعود بی بارزانی ، یانیندا حیات یولداشی و قارشیسیندا کلاشینکوف چولار اییلیب – دوزه لیردیلر.مئداندا ایسه 10 – 12 یاشینداکی اوغلو فوتبال توپونا تپیک ووروردو.توپو تئز توتوب و ایا تاپیب بو جاوانین آیاقلاری نین اؤنونده تیکمک اوچون یوزه یاخین کورد اوزو قویلو بیر بیرلری ایله دیدیشه – دیدیشه ، آمما گؤز آلتی مسعود بی ده باخا – باخا وورنوخوردولار.آللاه بو میللتی بو گونه قویان سییاست جی لری یئر اوزوندن سیلسه ، فلسفی کیمی لرین بو میللته حاکیم ائتسه ، نه تورکو ، نه کوردو نه عربی و یا فارسی جاوانلاری نین اؤلومونه یاس توتماز، اونلارین بوللوق ایچینده یاشاماسین تامین ائده ر.

بئله بیر دورومدا پ ک ک و پژاک کیمی تئروریست قوروپلارین اورتایا چیخاجاغی و بو گئری ساخلانمیش کوتله نین خبرسیزلیگیندن سواستفاده ائتمه سی قاچینیلمازدیر.هله عبدالله اوجالانین فارسجایا چئوریلمیش کیتابلاریندا فارس شوونیزمینه اولا آریا پرستلیک دوشونجه لری ایله تئهران حاکمیتی نین 50 ایلدن بری بونلارا اؤیرتدیگی ایرقچیلیق سییاستی نی بر آرایا گتیرنده چتینلیک لرین کؤکو داها دا درین لیک لره گئدیر.

اونون اوچون بیز هر هانسی بیر گؤزلنیلمز حادثه نین باش وئرمه سیندن ایندی دن اؤزوموزو حاضیرلاماقدان باشقا یولوموز یوخدور.

بو تئروریست قوروپلارا سسلنمی ین هئچ بیر فایدا وئرمه یه جه یینی گؤز اؤنونده آلاراق کورد میللتی نین اؤزه للیکله اورمو اطرافیندا اولانلارین عاقیللارینا سسله نه رک بو اویونلارا گیرمه مه له رینی ایسته مه لی ییک.

6- سایین بؤیوک بی رسول اوغلو بو موصاحیبه اینترنت سیته میز و توپراق درگی سینده درج اولوناجاق بو اوزده ن موصاحیبه نین سونون سیزه تاپشیرماق ایسته ییریک کی وطن دن اوزاق وطن عشقی ایله  میللتیمزه سؤزونوز وارسا بویراسیز.

سؤزو اوزالدیب سیزین و ده یرلی اوخوجولاریزین واختینی آلدیغیم اوچون عذر ایسته ییرم.آنجاق بعضی خاطیرلریمی دئمک له بونلارین تاریخینیزده قالماسی نین ضرورتی نی حیسس ائتدیگیم دوستلاریمیزا آیدین دیر.

وطن دن اوزاق سؤزونو ایشله تدیگینیزی گؤرنده اورمو اوچون تیر – تیر اسن اوره ک دؤیونتولری مین خیال قوشو بیرده قانادلانیب اورالارا گلدی.

دئیین گؤروم ، مرکزده کی او آشیقلار قهوه سی یئرینده دورور مو، آشیق - درویش آشیق دهقان سازلارینی سینه لرده وورور مو؟میللت یایی باغلارینا گئدیر می، قیز گلین لر پیشپیشانی یولورمو؟قاینانالار کولالاردا نئی قازانی آسیر می ، تویلاریزدا قیز – اوغلانلی جلمان صفی گئدیر می؟

درین حؤرمتله :بؤیوک رسول اوغلو

www.bati-az.com