آذربایجان اویرنجی حرکاتی
گله جک بیزیمدیر azoyrenci_herekati@yahoo.comآذربایجان اویرنجی حرکاتی
گله جک بیزیمدیر azoyrenci_herekati@yahoo.comموصاحیبه، موزاکیره یا موحاکیمه؟ گوناز تی.وی نین چاغریشینا باخیش
موصاحیبه، موزاکیره یا موحاکیمه؟ گوناز تی.وی نین چاغریشینا باخیش
بایراغ یا سیمگه قونوسو گونئی میللی هرکاتینی یئنی و تام آنلامیندا ده ییشیک بیر دنمه گتیریب چیخاردیب. ایللردیر گونئی هرکاتی اوچون بیر موشترک سیمگه نین یارادیلماماسی ندنلری نه اولا بیلیر؟
بللی اولدوغو کیمین، بو گونه قدر ایکی یا اوچ قوروم طرفیندن اؤز باشینالیغلا بایراغ اورتایا چیخیب. اؤز باشینا دئمگین ندنی اونا گؤره دیر کی بو قوروملار ایلک اؤنجه اؤنری اولاراق سوندوقلاری بایراغی داها سونرا تشکیلات بایراغی و داها سونرادا گونئی آذربایجان میللی بایراغی اولاراق مئیدانا چیخاریبلار! حیله بازلیق و دیکتاتورلوق، آنلاییشسیزلیق و سایقیسیز اولان بو قوروملارا ندن بو گونه قدر کسکین اعتیراض اولمونلاییب و گونئی هرکاتین ییپراتان سیمگه مسئله سی چؤزولمییب؟
سون زامانلاردا گونئیدن بیر سیمگه اؤنریسی اورتایا قویولدو. ایلک دفعه اولاراق، بیر اؤنری میللی فعاللارین گؤروشون توپلاماغ اوچون کامویونا سونولدو! بو اولای گرچکدنده گونئی میللی هرکاتیندا یئنی دؤنمین باشلاماسینا ندن اولوب.
سیمگه نی کیملر و نه آماجلاق اؤنریبلر بیر قونودور، آنجاق بو گونکی دورومدان میللی قازانجلاریمیزین ایلرله مه سی اوچون یارارلانماغ باشقا بیر قونو، و حتّی ان اؤنملی قونولاردان بیری!
من شخصن گوناز-دا گئدن سییاستلری به ینمه دیگیمه گؤره، اونلارین ایشلرینه داها باش قوشماغ آماجیم یوخدور، آما بو گئجه ایلگینج بیر اولایا شاهید اولدوغوم اوچون، مجبوری بو مقاله نی یازماغا قرار وئردیم.
اونوتمامیشام کی جناب اوبالی نین دستورو ایله تئلئفونلاریمی کسمیشلر، بای بک سیته سین صیرف منه باغلی اولدوغونا ایناندیقلاری اوچون تخریب ائتمیشلر و هر فیرساتدان آذربایجانین تاریخی دوشمنلری اولان باتی اولکه لرین سییاستلرین اویقولامیشلار! اولسون، دوشونجه آیریلیغی اولور آما، میللی وارلیغلاردان واز گئچمک بیزیم حرکتده خییانت آدلاندیریلیر. اگر گوناز و رهبری بو سؤزلره اعتیراضی واردیرسا، گلسین ایفشا ائتسین!
بایراغ مسئله سینه گلینجه، احمد اوبالی بو گئجه ایلگینج تاویرلارلا سانکی هامینی موحاکیمه ائده جک قدر گوجه صاحیبدیر کیمین، گله جک گونلرده هامینی محکمه یه چاغیردی! هر حالده تئلئویزیونی ایزله ینلر آنلاییرلا نه دئمک ایسته دیگیمی!
بایراغ یاراتانلارا، سیمگه اؤنرنلره و او اؤنریلری تارتیشانلارا سانکی خییانتکاردیرلار کیمی سالدیران جناب اوبالی، اونوتوبدور کی باشخانلاریندان بیری اولدوغو گایپ چته سی نین حاضیرلادیغی پارچانی ساعاتلرجه تئلئویزیونوندان رکلام ائدیبلر! صیرف گاموح-آ سالدیرماغ اوچون، گئدیب هر تورلو پارچالارین یارانماسینا مئیدان حاضیرلاییب و اونو تئلئویزیوندا میلته قبول ائتدیرمک ایسته ییبلر! اوستو آچیلاندادا، تشکیلات بایراغی دییه رک اورتادان قاچیبلار!
سؤزلریمین هامیسینا سندیم وار، دئسینلر کی یالاندیر، سندین همن اؤنلرینه قویوم.
اگر اوبالی بئی گرچکدنده آذربایجان میللی هرکاتینا اؤرک یاندیریر، پس ندن میللی فعاللارا سالدیراراق، اونلارا تؤهمت ووراراق و اونلاری تهدید ائدیرمیش کیمی تاورییلا پروقرام حاضیرلایاجاغیندان بحث ائدیر؟ اگر بو پروقرام بایراغ و سیمگه قونوسونا دئموکراتیک شکیلده یاناشاجاقدیرسا، پس بو ایفتیرالار و شانتاژلار ندن قایناغلانیر؟
من بئله اینانیرام کی بیر چوخلو ضیالی آرتیق گوناز لا دانیشماغ ایسته میرلر، دانیشماغا راضی اولان بیر نئچه سیده اولسادا، آرتیق بو سؤزلری ائشیتدیکدن سونرا هر حالده اؤزلرین کنارا چکه جکلر!
آخی نئجه اولور کی هم هامییا خائیین دییه سن، همده اونلاری تارتیشماغا دعوت ائدسن؟ سالدیریلارا معروض قالانلار پروقراما قاتیلماغی اؤزلری نین کیچیلمه لری کیمی دیرلندیریب و واز گئچدیکلرینده ده، جناب اوبالی هامی خائییندیر دیه اؤزون قالیب تانیتاجاق و من حاقلییام دئیه جک! یوخ جناب اوبالی، بو یولون سونو سیزه هئچ نه باغیشلایان اولمایاجاقدیر!
اگر بیر سورونا توخونماغ ایسته ییرسیزسه، او قونویلا ایلگیلی هر کسه سایقی ایله یاناشمالیسیز، هر زامان دئییرسیز کی بیر تشکیلاتا باغلی دییلسیز، نه ایسه من اینانمارام آما...، او زامان سیز طرفسیز اولاراق صیرف مسئله نین آیدینلانماسی اوچون پروقرام حاضیرلامالیسیز! سانکی سیزین تشکیلاتین بایراغینا ایهانت اولوبموش کیمین، یئنی سیمگه و اؤنریلن بایراغلارا تووهین ائده رک اونلاری قوندارما آدلاندیریسیز! لوطفا سیزده تیکراری سؤزلردن دئمه یین کی بیزیم بیر دنه میللی بایراغیمیز وار! سؤز بوردا گونئیدن گئدیر و گونئی اوچون یئنی و موستقیل بایراغین اولماسینا عاغیللا یاناشان هر کس اعتیراف ائدیب.
سیمگه و بایراغ مسئله سینه توخونماغ ایسته ین اؤزگور و دئموکرات بیر تئلئویزیون، ایلک اؤنجه اؤز چاغیریشی باره ده دوشونمه لیدیر. دعوت آدینا قوناغلاری اولکوتمک آخی هاردا گؤرونوب، هاردا قبول اولونان بیر ایشدیر؟
جناب اوبالی، اؤزو ییخیلان آغلاماز! سیزین آپاردیغینیز تخریباتچی سیاست سونوندا سیزه قاییداجاق، نئجه کی قاییدیبدیر! د.ا.ک گئنه سیزلرین برکتیندن پارچالاندی، خاطیرلیرام کی ایران-لا عراق ساواشیندا بیر نئچه ایرانلی پیلوت (خلبان) اوچوغلاری عراقا آپاریب و اورا سیغیندیلار، اولای موللالارین بیرینه چاتدیریلدی و او دئدی کی: هئچ نیگاران اولمایین، اوچوغلارین سندی بیزیم آدیمیزادیر! ایندیده د.ا.ک پارچالانیب آما، مؤهورلری بعضیلرین الینده دیر! گلین یاریشاغ گؤرک کیم داها هیزلی قاچار! بو دا سیزین اؤنریزدیر کی د.ا.ک-ی پارچالادیقدان سونرا اورتایا آتیبسیز، کیم چوخ ایشلرسه او بیری اونا قاوشمالی اولسون! کیمینله و نه اوچون یاریشیرسیز اوبالی بئی؟
حئیف، داها چوخداندیر کی سیزلرله تارتیشماغا سون وئرمیشم، آما گئنه میللی موجادیله میزه ماراخلی اولدوغوم اوچون مجبور اولدوم بو یازینی یازام. آما، من یا منیم کیمینلر اولماسالاردا، سیزین و هامیمیزین ایشلری مرجک آلتیندادیر و بیر گون هامیمیز جاواب وئرمه لی اولاجاییق. ۳ ساعاتلیغ پروقرامین ۲.۵ ساعاتی آمریکانین ایرانا قارشی یوروتدوگو سییاسته صرف اولونورسا، ائله اوندا سولدوز، اورمو، کرکوک، ناخچیوان، قاراباغ، بورچالی، تورکمنصحرا و انزلی کیمی یئرلره گئتمک ایمکانی اولمایاجاقدیر! آخی او قالان یاریم ساعات ایچینده ده اینسان هاقلاری یادا فارسجا مقالرلر اوخوناجاقدیر!
تشکیلاتلارینیزین هامیسین توپلاسانیز، باتی آذربایجاندا جانییلا چالیشان گئنج عسگرلریمیزین بیر دقیقه سی نین قازانجینی بیله الده ائده بیلمه سیز! تک سیز یوخ، سوزوم توم خاریجده کئیفه مشغول اولان قوروملا و شخصلردیر! ان آزی، گئچن ۱۵ ایلده نه لر ائدیبلر بو خاریجده یاشایانلار؟ اؤزلری بیربیرین قبول ائدیبلر می؟ نئجه اولور کی ایچریدن بیر قالخیش، بیر حرکت و بیر ایلرله مه مئیدانا چیخاندا هامی گئدیر میکروفون آرخاسینا؟ یانی کی گونئی هرکاتی نین لیدئریدیرلر می؟ یوخ آرتیق، اینانمیرام ایچریده کی لر بو سهوه بیر داها یول وئرسینلر.
منجه، سیز گله جک جانلی یایینیزدا بو چاغیریشینیزا دوزه لیش وئرمه لیسیز، ان آزیندان ایفتیرا آتدیغینیز صادیق میلتچیلردن عذر ایستمه لیسیز، داها سونرا، مدنی و دئموکراتیک یول ایله سیمگه و بایراغ مسئله سین آیدینلاتماغ ایسته دیگینیزی آچیقلاییب و قاتیلماغ ایسته ینلری ادب ایله پروقرامینیزا دعوت ائتمه لیسیز. او تی.وی اگر دئدیگینیز کیمی میللی هرکاتا حصر اولونوبدورسا، او زامان میلتیمیزین هر تورلو دوشونجه سینه اوندا یئر وئرمه لیسیز! سیزین سانسورالارینیز، سس کسمه لرینیز و میللی فعاللارا شارلاتان دئمکلرینیز گونازین گئچمیش ایمیجین آرادان آپاریر!
گونئی هرکاتی اوچون بیر سیمگه، گونئیده یاراناجاق اولان دئولت اوچون بیر بایراغ و میللی بیرلیگی الده ائده بیله جک گوجونه مالیک اولان بیر اورتام یارانمالیدیر. سیزین و بیزیم چابامیز بو یولدا اولاجاقدیر! نوستالژیلره، فانتازیلره و خولییالارا قاپانماقلا، نه آذربایجان موستقیل اولاجاق و نه بیزلر لیدئر!
میلتیمیز نه سیزین و نه باشقاسی نین یاراتدیغی پارچالاری ایسته میر! بو میلتین پارلامئنتی یوخدور، رئفئراندوما دا ایمکان یوخدور، ان آزی بو سینیخ سالخاخ قوروملار چیخسینلار اورتایا و آچیقجا سؤزلرین دئسینلر، ایچریدنده بیر نئجه نفر تاپیلار کی سؤزلری دیشارییا یئتیرسینلر. بو اولار گئچیجی بایراغین سئچمه پروسئسی نین باشلانماسی! یوخسا سیز دئیین اونلار ساتقیدیلار و آرا قاریشدیرماغ ایسته ییرلر، اونلار دئسین سیز ساتقینسیز و خاریجه قوللوغ ائدیرسیز، من دئییم کی ایسته میرم قارا اولسون، او دئسین کی ایسته میرم ساری اولسون، پس سوتلری کیم ساغاجاق؟
به ینمه دیکلریمیزین ایللردیر بایراغلاری وار، گئچیجی دئولتلری وار، خاریجده پارلامئنتلری وار، بیزسه بیر بیریمیزی دیدیب دیدیشدیریریک! بس دیر، میللی هرکاتا بوندان چوخ خییانت ائتمه یک! سیزده، اونلاردا و بیزده پارچالاریمیزی آتاغ بیر یانا، میللی بیر سیمگه اوچون موزاکیره ائدک! بونون نه سی پیسدیر؟ بونون هاراسی خییانتدیر؟ بونون کیمه ضرری وار؟ هر حالده بللیدیر کی میللی بیر سیمگه نین یارانماسی بیر چوخلو اؤز باشینا لیدئر و قوروما ضرر ووراجاقدیر، آما، سیزجه میللی قازانج و بیرلیک اؤنملیدیر یا تشکیلاتلارین یاساق ماراخلاری؟
لوطفا ایلک دفعه یارانمیش اولان بو دئموکراتیک تارتیشما مؤوقئییتیمیزی کورلامایین، اونا قارا یاخمایین و بوراخین تا ایلک و سون اولاراق سیمگه مسئله سی اؤز سونوجونا وارسین. بایراغسیز قالدیقجا، گونده بیر نفر باشقا تشکیلات قورماغ فیکرینه دوشه جک!
گئچی قالیب جان هایینا، لوتفن قصاب پیی آخدارماسین!
تبریزلی بای بک
