آزادلیق رادیوسونون توتوقلانان اؤیرنجی لرین عاییله لریله موصاحیب

آزادلیق رادیوسونون توتوقلانان اؤیرنجی لرین عاییله لریله موصاحیبه سی:

"من تورکم دییه نی محبوس ائدیرلر"

"اصلینده بونلار بیزه هئچ میللت گؤزونده باخمیرلار"

اییولون 17-سینده تبریز یونیوئرسیته سینین قارشیسیندا حبس اولونان 5 گنجه قارشی هانسی ایتهاملارین ایرلی سوردورولدویو بللی دئییل.

تبریز یونیوئرسیته سینین مئخانیکا فاکولته سینین ماگیستراتوراسیندا سون ایمتحانیندان چیخان سجاد رادمهر ، حقوق فاکولته سینین طلبه لری فراز زهتاب و آیدین خواجه ای ، ائله جه ده داریوش و شاهرخ حاتمی قارداشلارینین قوهوملاریله گؤروشلرینه ده ایجازه وئریلمه ییبدیر.

آیدین خواجه ای نین عاییله سی اونون هاردا ساخلاندیغینی اطلاعاتین تبریزدکی تجریدخاناسیندان ، محبوس اوچون پالتار گتیرمه لری خواهیش اولوناندان اؤیرنیب.

"منیم قارداشیمی اطلاعات اوغورلاییب ، اؤزباشینا اوغورلاییبلار ، هئچ بیر سند ده گؤسترمه ییبلر. گلدیلر ائویمیزه تؤکولوب آختاردیلار آما هئچ نه تاپابیلمه دیلر. اصلی کرم ناغیلینی، ایران تورکلرینین تاریخی کیتابینی، گؤتوردولر، بیزه ده باشقا معلومات وئرمه ییبلر کی، نه اوچون توتوبلار، نییه توتوبلار، نئچه گون قالمالی دیلار...."

محبوسون قارداشی رامین خواجه ای دئییر کی ، حبسه سبب آیدین بیین میللی حقوقلار اوغروندا موباریزه آپارماسیدیر.

"بورادا هر کس "یاشاسین آذربایجان" دئسه ، یا "یاشاسین منیم دیلیم دئسه"، و یا ساده جه "من تورکم، تورکو یازمالی یام ، تورکو اوخومالی یام"  دئسه، اونو محبوس ائدیرلر. حبسخانایا باسیرلار.. بیزیم آیدین بی ده اونلاردان بیریدیر."

رامین خواجه ای نین سؤزلرینه گؤره اونون قارداشی بوندان اوول میللی حقوقلار اوغروندا موباریزه سینه گؤره ایکی سئمئستر تدریس دن اوزاقلاشدیریلیب. ائله سجاد رادمهر ده مگیسترلیک ایشینی آلتی آیلیق قاداغادان سونرا مودافیعه ائده بیلیب. سجاد رادمهرین تحصیل حقوقونون پوزولماسی ایله باغلی ایران آذربایجانینداکی یونیوئرسیته لرده ایمضا کامپانییاسی باشلانمیش، طلبه نین اؤزو و دوستلاری اونون ایمتاحانا بوراخیلماسی طلبی ایله بیر نئچه گون آجلیق آکسییاسی کئچیرمیشدی. گئنیش میقیاسلی کامپانیا نتیجه سینده یونیوئرسیته تین رهبرلیی، سجاد رادمهرین بوراخیلیش ایمتاحانینا  و مودافیعه یه گیرمه سینه ایجازه وئرمیشدی. لاکین طلبه نین سئوینجی  ائله مودافیعه دن حبسه قدر بیر نئچه دقیقه سورمه لیمیش.

رامین خواجه ای دئییر کی قارداشی نین و دوستلاری نین تحصیلده اولان پرابلئم لری ده ائله آذربایجان مدنییتینی تبلیغ ائدن درنک لرده عوضولویوایله باغلی اولوب.

سجاد رادمهرین باجیسی الهه رادمهر 2006-اینجی ایلین مای حادیثه لریندن سونرا طلبه لره قارشی تضییقلرین آرتدیغینی دئییر.

الهه رادمهرده  رامین خواجه ای ده دئییرلر کی ، حبس اولونان گنج لرین هئچ بیر گوناهی یوخدور.

الهه رادمهر:

" قارداشمگیل هئچ بیر حاققی ناحاق ائله مه یییب ، هئچ بیر جیزیقدان چیخماییب، هئچ بیر یالنیش ایش گؤرمه ییب. هر حالدا چیخاجاقلار اونلاردا، بیز اونلارادا اینانیریق ایناندیقلارینادا".

" اصلینده بونلار هئچ بیزه میللت گؤزونده  باخمیرلار، بونلار بیزیم 30 میلیون آذربایجانلی نین دیلینی یئرلی – دیبلی دانیرلار. دئییرلر سیزین دیلینیز پهلوی دن گلمیش دیلدیر، حاققینیز یوخدور دئییه سینیز "منیم دیلیم وار" هر کیمسه ایسته سه ده بونون قاباغیندا دایانسین ، بونلار اونو اؤز گوجلریله آرادان گؤتورمه یه چالیشیرلار. بو یولدادا چوخلارینی اؤلدوروبلر، بیر نئچه هفته بوندان قاباق آیدین بیین یولداشلاریندان بیری فرهاد محسنی نین اؤلوسونو گؤلدن تاپدیق، اونودا اطلاعات اوغورلامیشدی"

داها اؤنجه حبس اولونموش میللی حقوقلار اوغروندا فعال فرهاد محسنی نین بیر نئچه هفته اؤنجه مئییتینین تاپیلماسینی خاتیرلادان جناب خواجه ای دئییر کی ، قارداشینین باشینا بیر ایش گلرسه نه ائده جکلرینی بیلمیر:

" بشری حقوق آیاق آلتیندا تاپدانیر بوردا. اونا گؤره ده دقیق بیلینمیر بونلار بیر شئی ائدجک آیدین گیله یا یوخ، آما بیر دفعه زنگ اولوب ائوه، اوندان بیلیریک کی دیری دیر. آمما بیلمیریک سونرا باشینا نه گلیر. آنامیز چوخ ایصرار ائدیر کی هئچ اولماسا اوغلومو گؤروم، بیلیم کی دیریدیر، اما بوردا گؤروش قاداغادیر".

الهه رادمهر دئییر کی اونون قارداشینین مقصدی سادجه اینسان کیمی یاشاماقدیر، "اینسانییتین بوتون قایدالارینا اویغون یاشاماق، قارداشیمین هدفی، اینامیدیر".

قایناق: http://www.azadliq.org/content/Article/1187382.html

خدیجه ایسماعیل اووا